Ondoy, Balik na Intawon(Request ni Inday Samdan)Ondoy, balik na intawon diri sa kang Inday nga dughan,
Sa dugay nga panahon kini siya kanunay samdan,
Intawon malouy ka ug si Inday lingion ug dili pasagdan,
Ang dughan nijang naghilak, gimingaw, imong makit-an.
Sa dihang nahimamat ka ni Inday sa dalan nga gilaktan,
Pagbati kanimo nabalhin nga sa uban gihatag nang daan,
Ambot unsay nahisulod sa utok ug kadto nahuna-hunaan,
Nilalang nga nauna sa dughan karon andam biyaan.
Gibiyaan Dodong nga sa kaanyag ni Inday gitagan-an,
Sa kalit lamang si Inday gibiyaan ug imong giltalikdan,
Ang gugmang tim-os ug tinuoray kanimo gipangandaman,
Ondoy, mipahilayo ka man sa dihang si Inday diha na sa atubangan.
Siguro nakaingon ka sa pagbati mo ikaw gibinoangan,
Nahisantop sa utok mo nga si Inday dili na kanimo pa angayan,
Kay duha ka nilalang sa makausa ija mang gidungan,
Apan wala mo lamang mahisabtan siguro, Ondoy, ang tanan.
Gimingaw na si Inday kanimo sa panahon nga tanan,
Sa mabugnaw nga gabii si Inday ikaw gihilakan kanunay,
Kay ang dughan nija niadto malipayon apan karon dug-an,
Mibiya ka ug ang ijang pagkatawo imo mang giyam-iran.
Ondoy, sa damgo ni Inday ug sa gugma nga tanan,
Ikaw ra intawon ang gitagan-an ug pagahalaran,
Balik na Ondoy aron si Inday mahimo nang bulahan,
Gugma mong walay tupong ija nang mahiaguman.
Balik na sa way duha-duha aron ang langit hikit-an,
Mga bulak nga pijuros sa pagbalik mo pagabukharan,
Ang banig sa pagbati nga dugay nang gihiklinan,
Sa mga abog sa kasikit ang unlan pagajabjaban naman.
Linkback:
https://tubagbohol.mikeligalig.com/index.php?topic=19857.0
Topic: Nagkalain-Laing mga Balak para ka nimo(Sumpay lang mo ha) (Read 254800 times)