Part l l
'Ngano ka? Naunsa ka? Sorry ha.' Automatik kining nasulti nako gumikan sa katingala sa dihang nakita ko ang iyang luha, bisan dyutay apan tiunay, nga nagpanukong mikanaog sa iyang aping. Gibakod nako siya ug gitarong ko ang iyang buhok. Gipahiran nako iyang mga luha. Ug igo na lang ko sa pagginhawa og lawom; nangawot sa ulo bisag way katol. Gibati ko nga daw adunay usa ka barel tubig giyabo kanako; ang kainit gibanusan og kahaw-ang.
'Sorry, don.' Sulti pa ni Nethla, dang gakos kanako. 'Di ko gusto nga maapil kas akong suliran nga giatubang karon.'
Gihagkan nako siya sa agtang ug gipangutana, 'Unsa gud diay nang imong suliran? Sultii ko, kung pwede. Andam kong maminaw ug mosabot. Nia naman jud ta niining dapita sa atong relasyon. Ug dili sakay-sakay ning akoang gibati nimo.'
'Buntis ko, don.' Tan-aw niya nako nga way pagduhaduha sa iyang gipamulong. Matud niya ang amahan sa bata mao ang iyang "best friend" nga tua sa Cebu nagtrabaho. Wala pa kini masayod. Ug mao nay usa sa iyang gikahadlokan kay wa siya mahibalo unsay angay niyang buhaton karon. Daghan pag gisulti kanako si Nethla kung unsang hitaboa nahitabo kadto, unsang matanga siya nga pagkalalaki, unsa kamahal niya ang lalaki--ug kada usa usab gitagsa-tagsa kog yabo sa lawod sa kalimot aron dili na kini ibanlas balik sa lapyahan sa akong hadurawan.
'Ayaw ko og biyai, don. Palihog lang.' Gigakos ko si Nethla uban sa pasalig nga anaa ra ko permi. Ug unsa ang gipasabot niini, langit ray nasayod. Nakabalo ko nga dili pa kini ang katapusan sa among panag-uban. Wa pa laktod hiposa ang sugbaanan sa payag; bisa'g ugma ug sunod pang mga ugma, kasugbaan pa kini. Kung karon, RARE ang pagkaluto, sunod, WELL-DONE na.
Naalinggatan namo ang hudyaka ug kinanatahay sa sulod. Nihukom kami nga mosawo sa ubang mga bisita. Sa didto na kos sulod, nahinungan mi sa Ate ug gipangutana ko niya, 'Diin man mo tood.' 'Didto ra kos gawas nagtabi mi ni Nethla', nakatubag pod oroy ko og dali. Syempre nangamdam nag unsay itubag sa posibleng mga pangutana. Kini laging nakadakop og pag-umangkon, kanunay mabinantayon.
'Unya nikaon na ka, don?' pangutana ni Ate.
'Human na, 'te. Nabusog na ko. Inum na lang akong kuwang. Pahilis ba.' dang pahiyom nako.
Sa kilid sa akong wala nga mata, nasiplatan ko si Nethla nga nag-text didto sa korner sa sala ni Ate.
Dayon nikurog ang akong cell. Pindot sa inbox. One message. I LUV U, DON. PWD TA MAGKITA SA TAGBILARAN?
Wa ko kabalo sa akong itubag. Apan nipindot lang jud ko para ibawos niya, OK....Message sent.
Nagkahinagbo na pod among panan-aw. Daw dihay kilat nga mitusok sa akong kahiladman.
Unya, nahikurat lang ko kay dihay miagni nako. 'don, kanta sa. Imong faborit', sulti pas akong amigo nga CAFGU, tiyo ni Nethla. Gidawat ko ang mic. Ug mikanta, bisag bug-at ang gibati. Mura kog gikapos-an og itlog.
bakit ngayon ka lang - freestyleLinkback: https://tubagbohol.mikeligalig.com/index.php?topic=18186.0
