(ang sumpay)
Ayaw Hiposa Kay Akong Balikon Part 1
Nakaangkon og taliwitw nga ilong kini si nethla. di nako ikalimod, usa kini's nakapaagni nako nga mopadool gyud kaniya. kanang dool diin nagkatakdo na ang mga tumoy sa balahibo sa among panit. kanang dool diin nabag-id na ang hapin sa among kalawasan. kanang dool diin nag-abot na ang mga singot gikan sa among lawas ngadto sa tipoanan aron nahimong usa na lamang ka tinulo sa tubig. kanang dool nga nahimong doot, diin bisan ang hangin, kung maipit, kahutdan sa iyang gininhawa.
igo na lang ningisi si Nethla human nako gipatugpa ang halok sa iyang ilong. gidasunan nako sa pangutana, Ok ra ka? niyango-yango ang iyang ulo, daw naggitik-gitik sa akong dughan. human, mitan-aw siya sa unahan ug hanghupaw. ug gigunitan niya akong duhang kamot aron ibalikos sa iyang hawak. daw gilahom silang duha sa kumumoy tungod sa kahomok sa iyang lawas. murag jello. ug karon, daw adunay nisalaob nga patyang kahoy sa akong kalawasan. giigang kog ahat bisag bugnaw ang kahaponon.
'Neth, abi nimo, di ko katoo sa atong gidangatan.'
'Nahadlok ka? matud niya. Wa man, ingon pod ko. Apan nasayod ka nga labaw pas amigo kining akong gibati nimo,' dasun pa nako.
'Niangay ba lagi ka nako? kay basig imo ra kong gisakay-sakayan', sulti pa niya.
Aduna siya'y gustong madungog. Busa gigunitan ug giliso nako ang iyang nawong paatubang kanako. Pagkalomoy sa aping. Nakaalinggat ko sa kahalangdon panagway ni Nethla. Sa ako kining gitotokan, ang iyang mata nagpangidlap, sama sa tubig nga naigo sa hayag sa buwan; ang mga balhibo sa kilay ug pilok nindot pagka-laray. makita nimo nga giatiman usab kini niya kay mailhan man nga naay inibtan. ang iyang ngabil, ingon sa usa ka tambis nga nagpaabot kuhiton aron madimdim ang iyang katam-is.
'i love you,' ang niguwa sa akong baba. ug daw nihumong pagtuyok ang kalibutan. gipugngan man ko kini nga mabungat pila ka mga semana nga nilabay, apan, karon mura kinig ihalas nga mananap-tinggawong nga gustong makaguwa sulod sa hawla nga gibilango-an.
Naglingi-lingi kos palibot kung basin naay nagpahipi ug nanglili namo. hahaha. wa ba kaha matinga si Ate nganong wa mi didto sa sulod sa balay? Ada, bahala na. Kung naay makakita, di lang mi estorbohon ug isumbong, ok ra nako. Mao ni sulod sa akong hunahuna. kini jung miangay ta, di naman tawn mahadlok.
Perting inita nas akong lawas. Hugot pas sinumpayan sa tubo sa tubig ang akong paggakos ni Nethla. Ug daw adunay naghuramintadong bulkan sa akong kahiladman, gusto na kining muulbo.
Ug wala lang damha nag-abot ang duha ka namo ka mga baba, murag baba sa gutom nga lion boot mokunis-kunis sa iyang tukbunon. Nagdinakpanay ang duha ka ngabil, sama sa mga bata nga naligo sa uwan, nangabasa. nanglagpot ang mga pulong I Love You sa among mga ngabil , matag higayon mapuwas ang hugot nga paghawok. nabati kos ang iyang mga palad nagdagan-dagan sa akong likod, murag hikap sa manghihilot nga makapatangtang sa imong gibati.
Ug nagbangutan ang unlan kay wa gyud siya magamit. Igo na lang kini nga midungaw samtang nagpatigholog ang duha ka anino sa sawog sa nasud-ipang payag nga nakasaksi og talan-awon.
Adunay gamayng suga ang payag. Naka-agni kini sa duha ka tangkob nga malipayong nagtuyok-tuyok ug naggukod-kugod alirong niini. Malipayon kaayo silang nagduwaduwa arong mabati ang kainit sa bombilya. Ang usa ka tangkob misakmit sa iyang kauban. Daw mihunghung kini kung unsa kalami sa hayag nga mialirong kanila. Nagpadayon ang ilang paglupad-lupad; mopataas naman, mopaubos na pod. Kung imong tan-awon mura og adunay bawod sa kahanginan. Taud-taud sad ang ilang duwa. Hangtud nabati nila ang hinuros sa hangin sama sa pulong mahait nga nag-abog kanila aron dili masakitan sa kainit sa suga. Ug nahanaw silang duha. Namingaw.
Ug nibanos ang hinay kaayong dangoyngoy gikan sa sawog ginama sa lipak.
(pagahumanon sunod gula)
http://www.youtube.com/watch?v=tKXpys3SCS4Linkback:
https://tubagbohol.mikeligalig.com/index.php?topic=18186.0