niadtong higayona wala gyud koy plano para ni Nethla. apan gaan akong pamati kaniya. dali siya nako nasood kay ako mang perming sungogon. game pod bayahana. motawag gani nako og kuya. ako pong ingonon, ayaw og "kuya-kuya" diha kay gamay ra ta'g distansya. mokatawa lang siya.
usa ka adlaw niana, mibisita niya iyang tiya, nga iyang gitawag og "ate." gipaila-ila ko niya. tood man, kini laging makamao pod ta mo abi-abi og tawo, nagkastoryahanay mi og dugay sa Ate ni Nehtla. asa ilang balay. unsa kasood si Nethla sa iyang pamilya. pila kabook sila nga managsoon. hapit tanan akong gipangutana sa iyang Ate. kuwang na lang mangutana ko og pila kabook kutsara ug tinidor sa ilang kusina. ahahaha.
dihay usa ka higayon nga giingnan ko ni Nethla, "Paadtoon ka ni Ate sa ila. Mag-videoke kono mo."
sus, kanindot sa balay ni Ate. Abroad man pod lagi ang bana. dakog swedlo ug dako jud tingali pod ang madawat niya ani kadabuwan. unya duha ra ang mga anak. sa pagsulod nako sa balay, didto nas Nethla sa sulod, gakanta-kanta. pagtan-aw nako sa lamesa, didto nay mga pagkaon. sinugbang manok, kinilaw nga isda, sinugbang isda ug unom ka grandeng San Miguel gabarog sa tunga ug tulo ka Tanduay long neck. akong hunahuna, inum jud ni.
sa dayon na namong inum, kanta ug kaon sa pulutan nga gitagana, nihagad dayon nako si Nethla sa pag-awit og kantang duet. Bakit Ngayon Ka Lang Dumating. haskang tikia. kagawason ko o dili. apan, iya kung gihangyo. ug kay nakainum na man lagi, ug tungod pod sa hangyo ni Ate, nikanta ko uban ni Nethla. makamao pod mokanta bayhana diay. usahay mogiling pog gamay kung maglami na among pagkanta. hahahaha.
seksi kaayo ra ba siyang tan-awon nga nagsoot sa iyang Yoga pants. mihulma ang lawas gikan sa hawakan hangtud sa iyang tiilan. naa pay dughan nga gaukdo, murag bungtod sa Mt. Mayon nga kaluha, gitabunan lang sa puting sinina nga minarkahan og "I am single. But I am ready to rumble."
matud ni Ate, "kini's Nethla, gwapa unta galing kay way laking moangay. kay arang kamaldita". ingon lang pod ko, "kining bato, bisan unsa kagahi, mahumok ra man baya na kadugayang tinulo sa tubig." dala na pod nakong tan-aw niya, nga nagsugod nag pamula sa aping gumikan sa iyang gitingal nga San Miguel beer. misamot kanindot niyang tan-awon.
ug ambot unsay nasulod sa akong puno-puno, nga ako man siyang giingnan, "Nehtla, pwede imong hiloton sa akong kamot? huwoy man, tungod tingali nis akong pag-drive sa motor." gidawat niya akong wala nga kamot. mitan-aw siya sa iyang Ate. iyang Ate mita-aw pod niya. nanggingisi. ug gisugdan og hapohap ang akong kamot.
wala ko dayon kabantay, gipatukar ni Ate pag-usab ang awit ug iyang gikanta...
Bakit Ngayon Ka Lang Dumating.
Linkback:
https://tubagbohol.mikeligalig.com/index.php?topic=18186.0