MikeLigalig.com

DAVAO. Tulo ka gituohang pusher ang nalit-ag sa kapulisan sakop sa San Pedro Police Station atol sa drug bust alas 2:15 sa hapon Dominggo didto sa Barangay 31-D ug Barangay 24-C Poblacion, dakbayan sa Davao. (Jeepy P Compio)


DUNGAN nga gipangposasan ang duha ka binabaye ug usa ka tomboy kinsa giingong mga notadong pusher sa Barangay 21-C ug Barangay 31-D Poblacion, ning siyudad sa Davao.

Ang tulo nasikop sa kapulisan sa San Pedro Police Station atol sa gilusad nga drug bust nga gipangunahan ni Police Chief Inspector Ronald Lim Lao ala 1:15 kagahapon sa hapon.

Unang nasikop mao sila Junhasir Bo Ecoras, 25, sa Purok 8, Barangay 31-D, ug Leah Clair Abad Asio, 36, residente sa Barangay 21-C Poblacion.

Ang duha nasikop human mibaligya og usa ka pakite sa gituohang shabu sa nagtakuban nga pulis, samtang nakuha sa ilang posisyon ang usa ka pakite ug P500 nga marked money.

Alas 2:05 sa hapon, gisunod og dakop ang usa ka Salimar Bulang Jamili, 20, residente sa Purok 8, Barangay 31-D.

Ang suspek giposasan sud sa iyang kuwarto human iyang gitunol ang shabu sa pulis nga iyang kasabot.

Nakuha sab sa iyang posisyon ang usa ka pakite sa shabu ug P500 nga marked money.

Mga dinakpan temporaryong gipangbalhog sa selda sa presinto dos samtang giandam ang kasong paglapas sa Republic Act 9165 kon Comprehensive Dangerous Drugs Act of 2002. (Jeepy P. Compio)


Gipatik sa mantalaang SuperBalita Davao Septembre 14, 2015.

Linkback: https://tubagbohol.mikeligalig.com/index.php?topic=80979.0