Ni Romeo T. Limpangog (Banat) | Updated July 27, 2015 - 12:00am
CEBU, Philippines – Nagdugta ang patay’ng lawas sa usa ka traysikad drayber nga gidakdakan og bato sa ulo napalgan diha sa Brgy. Ibabao, sa lungsod sa Cordova kagahapon sa udto.
Si Police Officer 1 Roselito Andales sa Cordova Police Station miila sa biktima nga mao si Reynante Silvano, nagpuyo sa maong dapit.
Matud pa ni Andales, Huwebes pa nga nasigpatan sa usa ka hilit nga dapit ang traysikad sa biktima apan wala kini panumbalinga kay nagtuo lang ang mga residente nga gibilin kini sa biktima sa maong dapit.
Apan niadtong Biyernes nakapanimaho ang mga residente og alisbo sa patay apan nagtuo lang gihapon silang patay kini nga ilaga o mananap ang nanimaho.
Kagahapon sa buntag ang mga lumolupyo wala na g’yud mahimutang sa grabe kabaho sa ilang palibot nagtinabangay og pangita sa gigikanan sa maong baho.
Diha nila nadiskubrehan ang patay’ng lawas sa biktima nga nagsugod na sa pagkadugta ug tupad ang nagkadugo nga dakong bato gituohan sa kapolisan nga gigamit sa pagdakdak sa iyang ulo.
Ang biktima buwag sa iyang asawa nga kasamtangang nagtrabaho sa Mactan Export Processing Zone ug aduna kini upat ka gagmay pa nga mga anak. – /EIM) (BANAT NEWS)
Linkback:
https://tubagbohol.mikeligalig.com/index.php?topic=80605.0
