Ni Romeo T. Limpangog (Banat) Updated April 12, 2011 12:00 AM
CEBU, Philippines - Niay leksyon alang niadtong mga kababayen-ang laagan, usa ka 21-anyos nga dalaga ang gilugos sa traysikad drayber nga iyang gisakyan tungod sa kahubog niini ala-3 pasado sa miaging kaadlawon sa sitio Calan sa barangay Poblacion, lungsod sa Cordova.
Si PO1 Ryan Casiban sa Cordova Police Station nga nahinabi sa Banat News miila sa suspetsado nga mao si Marjun Quirong, 23, taga sitio Puso sa barangay Poblacion sa maong lungsod human positibong giila sa 10- anyos nga batang lalaki nga bugtong nakasaksi sa maong insidente.
Matud pa ni Casiban nga sa imbestigasyon nga ilang gihimo ilang nasayran nga gikan sa usa ka imnanan ang biktima sa barangay Gabi ug nag-inusarang nag-inom hangtod nga nahubog.
Nagsusapinday na kini dihang miuli ug nasugatan sa suspetsado kinsa mipasakay kaniya aron ihatod sa ilang panimalay sa sitio Calan sa barangay Poblacion.
Apan giingong dihang nahidangat na sa panimalay sa biktima igo lang kini nga nakakanaug sa giluwanang traysikad ug nalup-og sa tugkaran ug natulog.
Matud pa ni Casiban nga tua sa gawas sa nasud ang mga ginikanan sa biktima ug bugtong ang 10-anyos nga saksi ray iyang kauban. Ang bata mitug-an nga nakamata siya pag-abot sa biktima ug iyaha kining gipukaw diha sa ilang tugkaran diin kini maghigda.
Apan giingong giabog siya sa suspek. Wala makabantay ang suspek nga mipahipi lang ang bata ug nasaksihan niini ang paglugos sa suspek ngadto sa biktima kinsa wala gyud makamata.
Human sa hitabo mibiya ang suspek ug ang bata nay mipahibalo sa dalaga sa gibuhat sa drayber sa traysikad kaniya hinungdan nga miadto sila sa kapolisan.
Si Casiban miingon nga namasahero pa sa iyang traysikad ang suspetsado dihang ilang gidakop. - (BANAT NEWS)
Linkback:
https://tubagbohol.mikeligalig.com/index.php?topic=40076.0
Topic: Hubog nga dalaga gilugos sa drayber sa traysikad (Read 866 times)