Ni Romeo T. Limpangog (Banat) Updated March 27, 2012 12:00 AM
CEBU, Philippines - Patay ang usa ka babayeng Japanese national kansang banang Filipino giimbestigar sa kapolisan tungod sa pagdudang maoy miunay niini pagdunggab sulod sa ilang panimalay sa Saint Dominic Subdivision sa sitio Sudtonggan, barangay Basak, dakbayan sa Lapulapu kagahapon sa kaadlawon.
Ang namatay mao si Kotoka Kagii Denila, 32, kinsa nakaangkon og samad dinunggaban sa dughan nga nakaingon sa hinanali niining kamatayon, samtang ang suspetsadong bana mao si Dexter Louie Armanio Denila, 27, walay trabaho nga lumad nga taga Tagom City, Davao del Sur ug kauban sa biktima pagpuyo diha sa nahisgutang subdivision.
Si PO2 Winston Ybañez sa Homicide Section sa kapolisan sa maong dakbayan miingon nga ang unang nakadawat sa alarma mao ang kapolisan sa Presinto 4 kabahin sa giingong panag-away sa magtiayon sa maong subdivision.
Apan ang mga barangay tanod sa barangay Basak nga unang nahidangat sa maong lugar miingon nga patay na ang asawa nga si Kotoka human makabaton og daghang mga samad dinunggaban sa dughan sulod sa balay niini apan wala na diha ang bana niini.
Si Denila nadakpan niana nang pagkabuntag sa dalan ug gituohan nilang padulong nga moikyas.
Si Jupel Baldosaro, nga katabang sa maong magtiayon sulod na sa unom ka bulan miingon ngadto sa kapolisan nga hubog nga miabot kagahapon sa kaadlawon ang iyang lalaking agalon gikan nakig-inom sa ilang silingan.
Matud pa niini sa kapolisan kusog kaayong nanuktok sa ilang pultahan si Denila hinungdan nga mikanaog gikan sa lawak sa ikaduhang andana ang biktima ug maoy miabli sa pultahan ug giingong sunod niining nadunggan nga naglalis ang magtiayon ug nadunggan niyang nangayo og tabang ang babayeng agalon.
Dugang pa ni Ybañez nga miadto sa kusina si Denila ug mikuha’g kutsilyo ug gisulod sa lawak ang biktima ug sunod niyang nadunggan nga nangayo og tabang kaniya ang agalong babaye hinungdan nga iyaha kining gisaka ug giingong naabtan niini ang biktima nga gituok sa iyang agalong lalaki ug gidunggab.
Human niini daling migawas gikan sa lawak ang suspetsado dala ang nagkadugo nga kutsilyo ug midagan kini paingon sa gawas sa ilang panimalay.
Dala ang anak sa mga agalon migawas si Baldosaro ug nangayo og tabang sa mga silingan.
Apan sa pagsukitsukit sa kapolisan kang Denila hugtanon kining mihimakak sa pasangil nga iyang gipatay ang iyang asawa.
Nangangkon hinuon kining dihang iyang naabtan ang asawa duna nay nagtaop nga kutsilyo sa dughan niini nga iyang giibot ug midagan siya sa gawas ug nangayo og tabang sa mga silingan.
“Lig-on gyud ning atong kaso base sa testimonya sa atong lone witness...atong masiguro nga atong mapasaka ang kaso,†matud pa ni Sr.Supt. Rey Lyndon Lawas ang direktor sa LCPO kinsa midugang nga problema ug away sa magtiayon ang hinungdan sa krimen.(/EIM)
Linkback:
https://tubagbohol.mikeligalig.com/index.php?topic=48734.0
Topic: Haponesa gipatay, bana nga Pinoy maoy suspetsado (Read 870 times)