Ni Dennes R. Tabar
Saturday, March 24, 2012
PATAY ang usa ka maguwang human gisukmag sa iyang manghod nga usa ka menor de-edad.
Nahitabo ang insidenti sa Barangay Basak, sa dakbayan sa Lapu-Lapu, pasado alas 6:00 sa gabii niadtong Biyernes.
Ang manghod ug maguwang nagkasukmagay human nasuko ang manghod nga gibadlong sa maguwang tungod sa pagsukol sa ilang amahan.
Ang namatay giila nga si James (dili tinuod nga pangan), 18, ulitawo ug ang gikatahapan nga iyang manghod giila nga si Boy (dili tinuod nga pangan), 16, nga pulos molupyo sa nahisgutang lugar.
Base sa imbestigasyon sa Homicide Section sa kapulisan, pasado alas 6:00, ang manghod nagkaaway ug sa iyang amahan. Wa matino sa taho kon unsay hinungdan.
Nisuway sa pagbadlong ang maguwang ug sila na hinuon ang nagkalalis.
Dugang sa kapulisan, nilakaw na lang ang maguwang apan nisunod ang manghod ug gisukmag ang maguwang sa apapangig nga niresulta sa paglamba nabunal ang ulo sa bato ug nakuyapan.
Daling gidala sa Lapu-Lapu City Hospital apan gideklarar nga patay nang midangat sa tambalanan.
Hinuon, ang gikatahapan nasikop lang usab daÂyon sa kapulisan ug mga barangay tanod samtang gitugyan kini ngadto sa womens desk sa Lapu-Lapu City Police Office (LLCPO). --Gipatik sa mantalaang SuperBalita Cebu Marso 25, 2012.
Linkback:
https://tubagbohol.mikeligalig.com/index.php?topic=48680.0
