MikeLigalig.com

DILI BABAG ANG KAPOBRE by LGU Toledo

Mao kini ang gipamatud-an ni Gloria Trazona nga bisan pa man sa iyang kahimtang, pwede gihapong molampos.

Usa ka urban poor si Trazona apan naningkamot nga makahuman sa kolehiyo taliwala sa kapit-os sa kinabuhi, dungagan pa ang hulga sa coronavirus.

Dugay man tuod niya nakab-ot ang iyang pangandoy apan dili kini rason nga moatras siya. Bag-o lang nipaso ang 56 anyos para mokuha sa iyang diploma sa Bachelor of Science in Education major in Social Studies diin dali pud niyang gipakita sa iyang 91 anyos nga inahan.

Si Gloria, presidente sa Sito Jardin Homeowners Association sa barangay Ilihan, dakbayan sa Toledo nagkanayon nga sa kadaghang babag sa iyang pag-eskwela determinasyon ra gyud ang iyang gidala.

"Hinaot nga lesson pod ni sa mga dili mopa-eskwela og mga anak ug sa mga anak nga dili mo-eskwela bisan naay ikagasto ang ginikanan," matod ni Trazona.

Si Trazona, usa sa pito ka anak sa mga mag-uuma sa barangay Canlumampao.

"Wala ko paeskwelaha kay hadlok ako mga ginikanan nga maundang ra gihapon og dili maayo ang ani" niya pa.

Og kay wala man siya gipaeskwela naminyo siya sa edad nga 17. Sa kapobre napugos siya sa pag-adto sa Hongkong para mamahimong katabang sud sa 15 ka tuig. Gibiyaan niya ang iyang tulo ka anak sa Pilipinas sa paglaum nga mausab niya ang dagan sa ilang kinabuhi.

Niadtong 2015 miuli siya og balik sa Pilipinas ug mi-enroll sa Alternative Learning System (ALS) diin milampos siya ug nitungtong sa kolehiyo sa 2016. Nahuman niya ang iyang kurso niadtong 2020, apan niini lang tuiga nga nakapaso siya tungod sa pandemya. 

Si Trazona presidente karon sa urban poor group sa Toledo ug usa ka sales executive sa Legacy Plains Memorial Park ug uban pang mga produkto sa real estate.

Get FREE 1024GB of cloud storage at www.terabox.com



Linkback: https://tubagbohol.mikeligalig.com/index.php?topic=123372.0