Ni Guam P. Logroño
Friday, July 6, 2012
HONOR student nga dalagitang tinun-an sa hayskol patay nang nakaplagan sa gihagbongan nga atabay.
Ang biktima gituohang gilugos una gipatay, gibinaklid sa paggapos ang duha ka mga kamot ug gihiktan ang
liog og t-shirt dihang nakit-an sa iyang igsuon sa 18-ka dupang atabay kagahapon sa alas 8 sa buntag sa
hilit nga lugar sa Sitio Dalinson, Barangay Tigbawan, lungsod sa Tabuelan.
Si Jelina Lahoylahoy, 13, 2nd year student sa San Remegio National High School, taga Barangay Tigbawan,
patay nang naugkat kagahapon sa alas 11 sa buntag sa atabay.
Si Insp. Roberto Hugo, hepe sa Tabuelan Police nga nahinabi sa Sun.Star Superbalita, nagkanayon nga ang amahan
sa biktima nga si Romendo, 61, mag-uuma, ni-report sa police station alas 12 sa gabii niadtong Huwebes human mahanaw ang iyang anak.
Gipahibawo niya ang mga pulis nga wa gyud mopauli ang iyang anak gikan sa eskwelahan sa lungsod sa San Remegio, hinungdan sa ilang kabalaka.
Niabot na lang ang gabii wa pa gyud kini mahiuli apan wa gyud nila mapalgi sa ilang pagpangita.
Matod ni Hugo nga kagahapon sa buntag dali nilang gihimoag follow-up operation ang insidente ug ilang nahibaw-an nga
nakit-an ang biktima sa iyang igsuon nga si Junie ug uyoan nga si Lando sa usa ka tabay.
Ang atabay may gilay-on nga duha ka kilometro gikan sa balay sa biktima ug tulo ka kilometro gikan sa karsada sa barangay
nga gihulagway nga pwerting mingawa kay sudlunon ug di maagian sa sakyanan.
Ang igsuon sa biktima maoy nikanaog sa ilawom sa atabay ug gihiktan gilayon og pisi dayon gibira sa ilang mga kabanay
ug mga silingan sa pag-aswat.
Nakurat ang mga kabanay ug ang mga pulis nga ningreponde human ang biktima kay gihigtan ang liog sa iyang t–shirt
nga puti hinungdan nga natuok.
Ang duha ka mga kamot gibinaklid sa paghigot sa plastic strew. Hinuon nagsul-ob pa kini sa sleeveless nga itom.
Diha pa siyay underwear ug shorts dihang naugkat sa atabay, apan ang iyang bag, sapatos ug ubang mga butang nahanaw.
Ang nawong sa biktima napuno sa lapok ug dunay mga garas-garas ang mga lawas niini apan wa pa gyud nila masuta kon unsa
pay laing mga samad niini sanglit nagpaabot pa sila kang Dr. Nestor Satur, chief medico legal officer sa PNP- Crime laboratory 7.
Ang biktima mag-birthday unta karong Hunyo 10 sa iyang ika-14 anyos nga natawhan.
Ang amahan nga si Romendo ug inahan nga si Corazon, 61, nibutyag nga wa silay kontra sa ilang lugar hinungdan nga
naglibog sila kon nganong niluog nga gipatay ang ilang kamanghuran sa pito ka mga anak.
Nahibaw-an hinuon niya nga ang iyang anak maghukas gyud sa iyang unipormi samtang maglakaw nga mopauli sa ilang balay aron di mahugaw.
Nakit-an pa siya sa mga silingan mga tulo ka kilometro ang gilay-on gikan sa ilang balay nga naglakaw mga alas 5 sa hapon
padulong mopauli apan ang giagian niini pwerti nga pagkalibuna, daghang mga kahoy, hagunoy ug mga sagbot.
Lagyo sab kaayo og mga silingan hinungdan wa gyuy nakakita kon si kinsa ang naghimo sa kremin.
Si Hugo nipadayag nga wa nila isalikway ang mga posiblidad nga gilugos ang biktima sa di moninos duha ngadto sa tulo ka mga tawo.
Di pa siya makasulti kon gi-gang rape ba kini o wa sanglit nanghipos pa silag dugang mga impormasyon sa pag-ila sa mga posibling responsabli.
Ilang balikan ang maong lugar ingon man manguha pa silag dugang detalye gikan sa pamilya, mga higala, classmate ug sa mga magtutudlo sa biktima.
Wa sab niya isalikway ang posibilidad nga ang suspetsado taga diha ra sa lugar.
Hinungdan nga iyang giduso sa pamilya sa pagpa-autopsy sa lawas kagahapon pagsuta kon unsay namatyan sa biktima.Guam P. Logroño.
Gipatik sa mantalaang SuperBalita Cebu Hulyo 07, 2012.
Linkback:
https://tubagbohol.mikeligalig.com/index.php?topic=52226.0