MikeLigalig.com

Ni Stephanie Viovicente-Berganio
Thursday, July 12, 2012


GISIKOP ang usa ka buntis nga maoy suspetsado sa sunod-sunod nga kaso sa pagpangawat sulod sa tunghaan nga nagsugod pa niadtong semana sa pagsugod sa klase sa City Central School sa Velez St., ning siyudad sa Cagayan de Oro.

Ang suspek giilang si Liza (bansagon gipugngan), 33, minyo, adunay duha ka address nga gihatag ninii, sa King Arthur, Puntod ning siyudad ug Zone-7, Bulua, lima ka bulan nga mabdos.

Sa interbyu sa Sun.Star SuperBalita ngadto kang Police Superintendent Danildo Tumanda, kinsa hepe sa Police Station 1 (PS1) sa Divisoria, gibutyag niini nga modus ni Liza ang magsige og pangbiktima dili lamang sa mga tinun-an apan lakip sa magtutudlo.

Mokabat sa 11 ka mga kaso sa kawat ang gikalambigitan ninii diha sa City Central School ug ubay-ubay ka mga nabiktima.

Magpasumangil kining adunay kuhaon sulod sa tunghaan ug magdrama, makighigala sa mga tinun-an ug kung masuod biktimahon pinaagi sa paghulam og cell phone ug dalahon na dayon niini.

Sa magtutudlo usab, lipaton lamang niini ang mga maestra nga kumpiyansa lang nga biyaan ang mga cell phone aron mag-CR apan pagbalik dala na niini ang cell phone.

Uwahing biktima ninii usa ka tinun-an niadtong Biyernes diin misaysay nga manghulam lamang og cell phone kaniya, tungod kay mabdos ug naluoy gipahulam apan wala gidahom nga gidala na niini ang cell phone.

Tungod kay naalarma na pag-ayo ang mga magtutudlo, nakuhaan kini nila og hulagway ug gihimoan og leaflets aron unta ipamilit ug ma-aware ang mga ginikanan ug uban mga tinun-an.

Apan wala pa gani napilit ang hulagway niini, mibalik kini niadtong Miyerkules mga alas 11 sa buntag ug didto deretsong gidakop kug gidala sa presintuhan.

Matud ni Tumanda nga sa ilang gihimong background check niini, nasutang napriso na kini sa kasong robbery apan nakagawas. Aduna na usab kini nabiktima nga magtutudlo sa Macabalan Elementary School diin nakuha gikan sa maestra ang bag nga adunay sulod laptop, jewelry, cell phone, cash nga P4 mil, ug uban pang mahalon nga butang.

Gawas niini, nangbiktima usab kini sa Puerto Elementary School diin usa ka tinun-an ug magtutudlo ang nabiktima nga nakuhaan gihapon og mahalon nga butang.

Matud ni Tumanda nga maoy ilang gi-trace kung asa ang mga items nga gikawat sa suspek tungod kay nasutang ipamaligya niini sa ubos ra kaayo nga presyo ang uban ipang prenda sa bisan asang pawnshop.

Gani aduna na kini gihimo nga grupo nga posibleng gitudloan ninii sa modus sa pagpangawat.

Subo nga gipahibalo ni Tumanda nga gibuhian ang suspek tungod kay wala kini naka-himo og krimen atol sa pagkasikop ug ang mga magtutudlo ug mga biktima nag-file pa og kaso aron deretsong makagawas ang warrant of arrest niini ug masikop. Gipasabot niini nga gisunod lamang nila pag-ayo ang proseso ug balaod aron dili makasupak.

Ang pangutana sa pipila basin unya mangbiktima kini pag-usab kay gibuhian man ug kung panahon mogawas na ang warrant of arrest niini asa naman kini pangitaon?

Gipatik sa mantalaang SuperBalita Cagayan de Oro Hulyo 13, 2012.

Linkback: https://tubagbohol.mikeligalig.com/index.php?topic=52603.0