Ni Jeepy P. Compio
Saturday, March 16, 2013
USA ka bana ang mitugpa sa balay tambalanan human gipusposan og dos-por-dos sa asawa kay wa mitrabaho alas 9:30 sa buntag niadtong Biyernes.
Si Sammy Letsones, 44, residente sa Roxas Boulevard siyudad sa Davao gidali pagdala sa mga personahe sa Central 911 sa Southern Philippine and Medical Center (SPMC) gumikan sa pagbuhagay sa dugo nga miagas gikan sa ulo.
Gibutyag sa bulletin sa SPMC nga padung na unta sa trabaho si Letsones.
Apan tungod kay nabana-bana niya nga ma-late na siya, nakahukom siyang di na lang motrabaho.
Samtang pauli sa ilang balay sa kanto Roxas, gidani siya sa iyang mga kaila nga mag-inom.
Wala makabalibad ang biktima, busa milingkod ug nakig-inom na lang sa mga kaila.
Apan usa ka barkada sa asawa sa biktima nakakita kaniya sa maong dapit busa gitug-an siya ngadto sa iyang asawa kinsa wala panganli.
Taud-taud, miabot ang asawa ug nagdala ug dos-por-dos nga kahoy.
Sa kalagot, walay daghang istorya ang asawa ug gipusposan ang bana tumong sa ulo.
Sa kakusog sa pagkabunal, mibuhagay ang daghang dugo sa ulo sa biktima. Daling nanawag ug central 911 ang mga kaila sa biktima ug gidala sa ospital.Hinuon, ang bana luwas na sa makuyaw nga kahimtang sulod sa balay tambalanan.
Linkback:
https://tubagbohol.mikeligalig.com/index.php?topic=71383.0
Topic: Bana gipusposan og kahoy sa asawa kay wala mosulod sa trabaho (Read 921 times)