Ni Stephanie Viovicente-Berganio, SunStar
Nagpaalim pa sa iyang samad ang usa ka bana gikan sa taas nga operasyon human giputol sa asawa niini ang kinatawo niadtong Lunes mga alas 3:00 sa kadlawon sa Barangay Tagbalogo, lungsod sa Naawan, Bukidnon.
Nilanding sa Northern Mindanao Medical Center (NMMC) ang biktima nga mao si Cresen Catian, 32, minyo, residente sa susamang dapit.
Gisaysay ni Cresen nga nahitabo kini niadtong Lunes sa kadlawon samtang siya hinanok sa pagkatulog. Gani namatikdan pa niya nga gihinol sa iyang asawa nga si Cheryl ang iyang kinatawo apan maoy iyang namat-an nga mipugsit na ang dugo ug tungod kay ngitngit iyang gipasiga ang suga ug maoy iyang nakita nga naputol na ang iyang kinatawo.
Wala na sab ang sumpay niini tungod kay gidala sa iyang asawa sakay sa ilang motorsiklo.
Matud ni Cresen nga posibleng nasuko ang iyang asawa tungod kay giingong nakig-sex siya sa ilang kauban sa trabaho ug nakigrelasyon.
Gani gi-amigo pa sa asawa ang babaye apan wala siya nasayod nga naa diay kini plano kaniya. Dugang ni Cresen nga mabdos ang iyang asawa ning panahona ug dugang niini nga nagluib usab kaniya.
Nasakitan man kini sa pagkawala sa iyang kinatawo apan hangyo niini sa mga asawa nga kung masuko sa bana dili pahimungtan ang kinatawo.
Gioperahan sa NMMC ang biktima ug luwas na sa makuyawng kahimtang.
Si Senior Inspector Yabu sa Naawan Police Station niingon nga hangtod ning panahona wala pa nila nakita ang asawa ni Cresen nga misibat dala ang motorsiklo sa biktima.
Linkback:
https://tubagbohol.mikeligalig.com/index.php?topic=73331.0
