Ni Stephanie Viovicente-Berganio
NAKABSAN sa kinabuhi ang usa ka piniriso nga dunay kasong pagpanglugos human gituohang gi-atake sa iyang sakit niadtong Martes mga alas 12:00 sa udto sa Northern Mindanao Medical Center (NMMC) ning siyudad sa Cagayan de Oro.
Giila ang biktima nga mao si Ricardo (apelyido gitago), 70, residente sa Barra, lungsod sa Opol, Misamis Oriental ug nag-atubang sa kasong pagpanglugos sa iyang 8-anyos nga apo.
Si Tata Pador kinsa personnel sa Misamis Oriental Provincial Jail (MOPJ) nibutyag nga niadtong Lunes iyang namatikdan nga nagluya pag-ayo si Ricardo ug mireklamo nga lain iyang lawas.
Tungod niini iyang gipangitaan ug escort ug ilang gidala sa NMMC. Sa pag-admit niini ilang nasuta nga adunay kini sakit nga tuberculosis (TB) ang suspetsado. Apan niadtong Martes mga alas 12:00 sa udto nakabsan sa iyang kinabuhi si Ricardo.
Matud ni Pador nga niadtong Abril 13 gibalhog sa MOPJ si Ricardo tungod sa kasong pagpanglugos sa kaugalingon nga apo. Gani niangkon pa kini kaniya nga iya gyud nga nahilabtan ang apo ug bisan mangayo pa siya ug pasaylo nahitabo naman ang tanan.
Gikasubo usab niini nga ang iyang pamilya wala na miduaw pa kaniya ug tungod niini nanawagan si Pador sa pamilya niini nga moadto sa ilang buhatan aron mapaabot ang gamay nga assistance, ug bisitahon ang patay’ng lawas niini nga anaa sa Bollozos funeral parlor.
“Tungod kay detinado man sila diri sa MOPJ among tulubagon nga ipahaluna ilang patayng lawas, tagaan siya og lungon ug ipabalsamar,†matud ni Pador.
Gituohan ni Pador nga posibleng tungod sa gihimo niini sa kaugalingon nga apo mipalayo gyod niini ang pamilya hinungdan nga hangtod sa pagsulat ning balita wala gyod mipatim-aw ang pamilya ingon man asawa ni Ricardo.
Linkback:
https://tubagbohol.mikeligalig.com/index.php?topic=73332.0
