MikeLigalig.com

Wednesday, April 29, 2015
Ni JEEPY P. COMPIO


PATAY ang usa ka amahan human gipusposan og kahoy sa iyang anak nga nasuko kay giingnan siya nga tapulan.

Ang insidente nahitabo alas 2:30 sa hapon, Martes, didto sa Purok 7, Isla Verde, Barangay 23-C Poblacion.

Ang biktima mao si Saulo Estandarte Flores, 51, minyo, nagpuyo sa nasampit nga dapit.

Subay sa inisyal nga imbestigasyon ni Police Officer 3 Sevner Andaya Neri, nasayran nga nasuko ang suspek nga si Melvin Sampilo Flores, 26, kay giingnan siya nga tapulan.

Daling mikuha og kahoy ang suspek dayon sugo sa nag-alitabo nga kapungot daw giyawaan ug hinurot ang kusog nga iya kining giayo og puspos sa iyang amahan sa makadaghang higayon nga miresulta sa hinanaling kamatayon niini.

Gisulayan pa og dala sa ospital ang biktima apan nabugtoan na kini sa iyang kinabuhi samtang ang suspek daling gisikop sa kapulisan.

Ang patay nga lawas sa biktima anaa sa Angel Funeral Homes samtang ang suspek temporaryong gibalhog sa selda sa Sta. Ana Police Station ug giandam ang kasong parricide sa korte.


Gipatik sa mantalaang SuperBalita Davao Abril 30, 2015.

Tapolan kuno apan kugihan mopuspos sa amahan...

kay ngano laging iyang giingnan nga tapulan; tua, ningkugi hinoon.