Ni Jojo C. Ugdol/GMR (Banat) | Updated May 7, 2015 - 12:00am
CEBU, Philippines - Patay ang 26-anyos nga lalaki human pusila sa sementeryo sa barangay Maghanoy, lungsod sa Barili pasado alas 5 kagahapon sa kaadlawon.
Ang biktima giila nga si Glenn Mark Sarto, ulitawo nga nagpuyo sa mao’ng barangay.
Matud ni Police Officer 2 Jeffrey Alpas, desk officer sa Barili Police Station, nga usa ka tawag gikan sa concerned citizen ang nagpahibawo kanila nga dunay tawo nga gipusil sa mao’ng lugar.
Sa pagresponde sa kapolisan ila na lang nga nakita nga nagbuy-od na ang biktima nga may mga samad pinusilan sa mata ug lawas.
Si Alpas nagtuo nga posible’ng giatangan ang biktima sa sementeryo diin may mga dalan nga lusot sa bisan asa’ng bahin sa barangay.
Sa inisyal nga imbestigasyon sa kapolisan nasayran nga igo lang nakadungog og buto sa armas ang mga nagpuyo sa mao’ng dapit sayo sa buntag ug ila na lang nakita nga nagbuy-od na sa sementeryo ang biktima.
Blangko pa ang kapolisan sa motibo ug sa nihimo sa krimen. (BANAT NEWS)
Linkback:
https://tubagbohol.mikeligalig.com/index.php?topic=79923.0
