Friday, March 11, 2011
LIMA ang mitugpa sa tambalanan human sila gipangtigbas sa ilang ama-ama (stepfather) samtang natulog alas 11:10 sa gabii niadtong Huwebes.
Mga biktima mao sila Gregorio Enoy, 23, minyo; Jerry Boy, 13; Carlo, 6; Donna, 4; ug Darwin, 2, nagpuyo sa Purok 25, Malagamot, Barangay Panacan, siyudad sa Davao.
Si Marlon, 15, nagbutyag sa Superbalita nga unang gihapsan sa hait nga sundang ang iyang ig-agaw nga si Gregorio sa suspek nga si Peroy (bansagon gitago tungod sa hangyo sa pag-umangkon nga sakop sa media), 55, nagpuyo sa Barangay Marayag, Lupon, Davao Oriental.
"Akong nakita ang suspek nga iyang gitigbas-tigbas si Manong Goyong dayon iyang gisunod ang mga bata. Pagkakita niya sa ako, iya unta kung tigbason mao nga midagan ko ug nangayo dayon og tabang sa akong uyuan," pahayag ni Marlon.
Si Gregorio nakaangkon og daghang samad sa iyang ulo, tiyan, mga kamot ug ubang parte sa lawas samtang si Carlo naigo sa iyang walang tuhod, wala ug tuong braso.
Si Donna nakaangkon sab og samad sa iyang walang kamot. Si Mark naigo sa iyang kilid ug sampot samtang si Darwin naigo sa tuong siko.
"Pag-abot sa akong uyuan sa balay, wala na didto ang suspek. Wala na sab namo siya nakita kay ngit-ngit kaayo ang among lugar," dugang ni Marlon.
Si Jesaniffer, igsuon ni Gregorio, nagsulti sa Superbalita nga nahigmata sila dihang nakadungog sila og singgit sa mga gagmay nga bata.
"Ang among namat-an mao ang singgit sa mga bata ug sa among pag-adto sa balay ni Manoy Goyong, duguan na silang tanan," saysay ni Jesaniffer.
Nasayran nga upat pa lang kaadlaw nga miabot ang suspek sa balay sa mga biktima diin nagpuyo ang iyang kapuyo nga si Nelia Ibuk, 33.
"Bag-o ra na siya miabot sa balay ni Manoy Goyong. Miapas man na siya sa iyang asawa-asawa nga inahan ni Aiza nga asawa ni Manoy Goyong," sulti ni Jesaniffer.
Si Peroy giingon nga gikan pa sa ilang lugar sa Davao Oriental kinsa miuban sa iyang kapuyo nga si Nelia.
"Mianhi nang iyang asawa sa Davao kay manarbaho ug diha sila nagpuyo sa balay sa akong igsuon. Gipapuyo pa siya (suspek) ug gipakaon unya gusto pa niyang patyon ang akong igsuon. Wala siyay batasan," dugang ni Jesaniffer.
Gidudahan nga naaburido ang ulo sa suspek sanglit wa nakauli ang iyang asawa nga si Nelia gikan sa gitrabahoan nga karenderya sa Panacan.
"Nagtrabaho ko kauban nako ang akong anak nga si Aiza. Sila lang ang nabilin sa balay. Wala na ko nahibalo kung unsa ang hinungdan nganong nasuko siya," pasabot ni Nelia.
Si Nelia nagkanayon nga lima na sila katuig nga nag-ipon sa suspek sukad nga namatay ang iyang unang bana.
"Lima na mi ka tuig nga naglive-in. Mianhi siya sa Davao kay gusto niyang motan-aw sa akong anak nga nahospital," sulti ni Nelia.
Si Nelia midugang nga niadtong miaging adlaw gusto na nga mouli si Peroy didto sa Davao Oriental, apan wa pa niya gipapauli sanglit wa pa silay kwarta nga ikapamilete.
Tungod sa nahitabo sa mga biktima, suma ni Nelia, nahanaw na ang iyang gugma sa suspek kinsa padayong nagtagu-tago kagahapon sa buntag.
Ang pag-umangkon sa suspek nagbutyag sa Superbalita nga wa pa nakabiya ang iyang uyuan didto sa Malagamot sanglit di kadto suheto dinhi sa siyudad sa Davao.
"Di pa to siya makalakaw og layo. Wala man to nasuheto dinhi Davao mao nga nabalaka ko sa iyang seguridad," sulti sa pag-umangkon kinsa naghangyo nga di isuwat ang pangalan sa Superbalita.
Mga medisina, tanang kinahanglanon sa mga biktima giabaga na sa Lingap Para sa Mahirap Program ni Mayor Sara Duterte. (Alger Dura)
Gipatik sa mantalaang SuperBalita Davao Marso 12, 2011.Linkback:
https://tubagbohol.mikeligalig.com/index.php?topic=38870.0