Tuesday, March 15, 2011
KRITIKAL ang kahimtang sa usa ka mag-uuma human nahug sa pangpang alas 6:20 sa gabii niadtong Dominggo didto sa probinsiya sa Cotabato.
Nasayran nga ang biktima nga si Elizar Catahom, 42, minyo ug molupyo sa Sitio Palupain, Barangay Dado, Alamada sakay sa iyang binuhing kabayo sa dihang nahitabo ang insidente.
Sumala sa imbestigasyon sa Cotabato Police Provincial Office nga ang gisakyan nga kabayo ni Catahom miagi sa kilid sa lawom nga bung-aw apan kalit lang nadakin-as ang usa ka tiil sa hayop hinungdan nga wala makabantay ang biktima og nahug sa pangpang.
Mga tawo nga nakakita sa hitabo dali nga miluwas sa biktima ug gidala sa Cotabato Regional and Medical Center sa siyudad sa Cotabato.
Sumala sa doktor nga nag-atiman kang Catahom, grabe ang iyang kahimtang human nga nakahiagum og mga bali sa iyang lawas.
Gisulti ni Alberto Tajil, usa sa mga nakasaksi sa hitabo, nga ang nahulugan sa biktima gibana-bana nga dunay gilawmon nga 20 ka tiil.
Nagtuo ang otoridad nga ang maong insidente nahitabo tungod kay niadtong tungura kusog ang ulan ug humok ang yuta nga kilid sa pangpang hinungdan nga nadakin-as ang kabayo. (EF)
Gipatik sa mantalaang SuperBalita Davao Marso 15, 2011.
Linkback:
https://tubagbohol.mikeligalig.com/index.php?topic=39036.0
