Ni Rey Pasaporte (Banat) Updated December 30, 2011 12:00 AM
CEBU, Philippines - Usa ka 11-anyos nga batang babayeng tinun-an pa sa grade one ang giingong gi-gang rape sa tulo ka mga batang lalaking pulos sad menor de edad nga iya ra sab nga mga silingan diha sa pinuy-anan mismo sa biktima sa usa sa mga barangay sa dakbayan sa Naga.
Ang ginikanan sa biktima unang midangop sa kapulisan niadtong Martes ug pagkasunod adlaw midangop sa Tv5.
Misaysay niadtong Martes ang inahan sa Womens and Childrens Protection Desk (WCPD) sa Naga Police Station nga niadtong Disyembre 23 gipugos pagpasulod ang iyang anak sa ilang pansayan sa tulo ka mga suspetsadong menor de edad ug didto gitabangan og pahimulos.
Si PO1 Charlotte Losbaños sa WCPD sa Naga Police Station dihang gikahinabi sa Banat News nagkanayon nga wala diha sa ilang balay ang inahan sa biktima atol sa hitabo.
Apan wala na mohatag pa og dugang detalye si Losbaños sanglit wala pa na-traumatized ang bata.
Sa pagkakarun ang tulo ka mga suspetsado gawasnon ug kun mahuman na ang imbestigasyon sa kapulisan ilaha na kining imbitahon.
Sa interbyu sa Tv5, ang inahan sa biktima mitug-an nga dihang iyang gipangutana ang anak igo lang kining misulti nga gihuboan sulod sa ilang pansayan sa tulo ka mga suspetsado apan wala na kini motiwas og tug-an nga daw nahadlok.
Nagtuo ang inahan nga nahadlok na kini sa iyang gidangatan ug unsay mahitabo pa kaniya sa umaabot pang mga adlaw.
Gipatawag na sa barangay ang inahan sa bata lakip ang biktima aron himoan og imbestigasyon ug mapatawag ang tulo ka mga menor de edad nga suspek .
Matud sa usa sa mga konsehal sa barangay nga andam sila nga moabag sa biktima ilabi na kung ipasaka na unya ang kaso apan magdepende kini sa resulta unya sa imbestigasyon sa kapulisan.
Hinuon sa resulta sa gipahigayon nga eksaminasyon way nakitang timailhan ang mga doktor sa Vicente Sotto Memorial Medical Center (VSMMC) nga gihilabtan ang bata.
Apan bisan pa man niini nagkanayon si Brenda Gabatu, pangulo sa City Social Welfare and Development sa syudad sa Naga nga ilaha gihapong ipaubos sa counseling ang biktima. (BANATNEWS)
Linkback:
https://tubagbohol.mikeligalig.com/index.php?topic=45049.0