TUNGAW
balak ni Rene Estella Amper
Dugay nang wa ko makakitag tungaw.
Kaniadto ang kamalig luyo sa among payag
kanunayng nagbuskad sa mga sinangging mais.
Makigbugtaway ako kanunay
sa mga anino sa mansanitas sa kilid
sa among payag human sa pamahaw.
Inigkaudto gikang mangahoy kuyog ni Tatay,
Mohapit ko’g pamayabas. Inig-abot nako
sa amo, moingon si Tatay,
“Hala, panghinungaw!â€
Buk-on sa uwak ang kaudtohon.
Kanunayng puno sa gangis ang kawayanan
sa ubos-ubos sa among kamalig.
Didto sa pantaw sayon kaayong utingkayon
ang mga paboritong luklokanan sa tongaw:
ang mga landong sa ilok,
ang mga tulokibong lugot sa pusod,
ang angtod nga kamingawan sa bulog.
Ang pagpanguhit og tongaw susamag bation
Sa pagpalupad og tabanog.
Gimingaw ako sa mga gamayng butang
sa akong pagkabata nga akong gibiyaan
sa dihang nagsugod na pagpanurok
ang mga tango sa gugma.
Karon nga usahay sila modalikyat
pagpamalik ngari kanako,
wa na akoy nahibiling kinuptanan
gikan kanila. Kon adunay mangutana,
tubson ko na lang sa pasumbingay
aron dili maugoy ang otoy-otoy sa balatian.
Si Nanay dugay nang mihunong sa pagpasuso.
Ang mga bukog ni Tatay amo nang gitipon
sa mga bukog sa iyang katigulangan.
Dugay nang wa ko makakitag tungaw.
Linkback: https://tubagbohol.mikeligalig.com/index.php?topic=26311.0
