Ikaw Ug Ako Ug Ang Atong Sugilanongitagik ni Michael LigaligI.
Ikaw ang dugokan sa matag sugilanon
Nga mahimugso sa lawak ning handurawan.
Wa untay gumunhap nga maumol,
Wa untay mga yugto ug anib nga mahikay,
Wa untay mga pangandoy ug pangindahay,
Nga mopaluyo sa kinabuhi sa mga karakter
Kung dili pa tungod sa imong pagpatim-aw
Sa likoliko kong dalan paingon sa kataposan.
Matag hinashasang pulong nga gigaray
Alang sa paggambalay sa gitinguhang lintunganay -
Ikaw ang nahimo kong gabayan sa hunahuna
Ang kahayag nga nagbanwag sa dulom nga unahan.
II.
Ug adunay sugilanon diha sa atong sugilanon
Nga nagpabiling tanghaga kanatong duha.
Nasayod kita sa mabulokong sinugdanan
Apan wa ta mahibalo sa gabonong kataposan.
Nahan-ay na unta ang dugokan
Apan diha sa mga yugto ug anib
Nga misugod pagdugtong sa duha ta ka dalan,
Ang gumunhap sa atong panaglagyo mipukan
Sa atong mga pangandoy ug pangindahay
Ug mao na lamay nahibilin sa unahan
Ang likolikong lintunganay sa sugilanon
Nga nagpaabot sumpayan ug taposon.
Linkback:
https://tubagbohol.mikeligalig.com/index.php?topic=9091.0