Hello Yaki,
Kung mosulat ko ug balak, dili ko huna-hunaon ang porma, punctuation o kaha ang mahimong reaksyon sa akong mga magbabasa.
Lahi lang seguro pud ko ug gibarogan nga katarongan ug pagtuo sa mga balak. Ug wala pud ko mosubay sa mga lagda o sumbanan sa balak nga gisunod sa uban.
Para nako ang balak mahimo lang siya nga may gahom kung kini motadlas sa kinauyokan nga bahin sa kasing-kasing sa alimpatakan ug kasing-kasing sa tawo.
Sa mga writers workshop nga akong natambongan (UP Writers Workshop and Iligan National Writers Workshop), wala ko mouyon sa mga gipamulong sa mga anaa sa academic world. Para nako ang balak usa ka personal nga kabahin sa tawo ug dili angay nga mahigut sa mga pamalaod sa libro.
Kagawasan ang akong gipangandoy sa balak. Sa dihang si E.E. Cummings nagsugod ug bag-ong stelo, daghang wala mouyon sa iyang mga balak, apan karon ang kalibutan naghangad ni e.e. cummings. Maingon man usab si Allen Ginsberg. Misupak ang Amerika sa pamaagi sa iyang pagsulat sa balak, apan si Allen Ginsberg gidayeg pag-ayo sa kalibutan. Silang duha nahimong gawasnon ug misulat ug mga balak nga wala nasubay sa lagda.
Akong namatngonan nga kung walay kagawasan ang pagsulat ug balak, nan dili na kini balak, kung dili "term paper."
Ang balak sama ug busay nga nag-agay gikan sa akong kasing-kasing ug huna-huna. Pasagdan ko kining moagas gikan sa akong mga tudlo nga walay paghuna-huna kung kinsay mapiskan o kaha kinsay moinum ug modumili sa pagtagay niini.
Sa dihang akong ipaagay ang akong mga balak gikan sa akong kasing-kasing, dili ako maghunahuna o manumbaling kung kini aduna bay chlorine o kaha mipasar ba kini sa ISO 9000 o kaha miagi ba kini sa pamalaod sa NAWASA o DPWH. Ipaagas ko lang ang balak nga may kagawasan gikan sa akong handurawan hangtud mahimo na kining usa ka dagat nga kaliguan unya sa mga sumusunod sa atong henerasyon.
Linkback:
https://tubagbohol.mikeligalig.com/index.php?topic=9092.0