Bisan Tubig Mahalby Michael Ligaligas published by the Bohol StandardUsahay dili ko kasabot nganong labihang mahala ang presyo sa bottled mineral water. Gani pa man, labaw sa tinunga ang presyo sa mineral water dinhi sa ato sa Pilipinas kung ikomparar nako didto sa Thailand. Pareha ra man unta tubig. Kining maong produkto wa man unta niy daghang hago sa paggama kay human-daan naman ning tubig. Dawat-limpiyo nalang ang mga kompanya.
Ang padayon nga pagsaka sa presyo sa bottled mineral water miabot sa punto nga ang tubig mas mahal pa sa gasolina ug mas mahal pa sa softdrinks. Hinuon dili gyud ko ganahan moinom ug softdrinks kay para nako wa niy hinungdan sa lawas. Gani pa man, daghan nang mga pagtuon ang gihimo nga nagpamatuod nga ang softdrinks usa sa hinungdan sa pagkaylap sa sakit nga diabetes.
Karon, nagpasabot ba kini nga ang maulipon nalang ta hangtod sa hangtod sa kamahal sa presyo sa bottled mineral water? Ngano man sauna walay mineral water nabuhi man ang mga tawo? Ug gani pa, mas tag-as pa ang edad sa mga tawo? Mao nga kung nabuhi ang mga tawo sauna nga walay bottled mineral water, nganong dili man ta mabuhi karon?
Sulayon gyud seguro nato nga undangon sa pagpalit ug bottled mineral water aron tagaan ug leksyon ang mga kompanya nga nagpaturagas lang pagpasaka sa presyo niini. Problema ani kay daghan nang mga tawo ang na-sold-out sa advertisement nga mas makaayo sa lawas ang mineral water. Apan ang tinuod, dili kini tinuod. Ang natural nga tubig magpabiling dili hilabwan kung kaayohan lang sa lawas ang hisgutan.
Duna nay mga nasud nga misugod ug diskorahi sa ilang mga katawhan sa pagpalit sa bottled mineral water tungod lagi sa plastic nga basura nga gikahatud niini sa atong palibot.
Nahinumdum ko niadtong misaka sa Mt. Apo niadtong tuig 2002, usa sa among mga gibuhat mao ang paghipos sa mga inimnan nga botelya sa mineral water nagpasad sa mga dalan nga among naagian. Ug nasayod ta nga kining plastic dili gyud malata bisan pila pa ka gatos nga anyos nga mainitan ug maulanan.
Sa laktod nga pagkaestorya, ang binotelya nga mineral water nagdugang ug basura sa atong katilingban. Ang nahitabo mao nga ang atong gobyerno wala pa makakita ani nga problema. Apan sa ubang mga nasud, ang ilang gobyerno nahigmata na niini.
Usa pud sa angayan natong hinumduman nga dili makaayo sa lawas nga gamiton pag-usab ang gigamit na nga botelya sa mineral water. Matod pa sa mga health experts, kung natungab na nimo ang maong plastic bottle ug gamiton nimo pag-usab kini, daghang kagaw ang mosulod sa imong lawas. Malikayan lang kini nga mga kagaw kung ayo-ayohon ug hugas ang maong botelya ug kolitogon ang tanang ngilit sa baba niini sa dili pa tungabon pag-usab.
Dako ug makuha nga suliran sa problema kung ang mga tawo makaamgo na niining maong kamatuoran. Daghan usab ang makadaginot sa kwarta kung tanan nato didto lang gyud modangop sa purified water ba kaha.
Ug mahalan pa gyud ka sa bottled mineral, nia diay labing maayo nga imnom. Lubing butong. Mas hinlo pa ni sa purified nga tubig ug makahugas sa sulod sa imong lawas. Ayaw na sanggota nang imong lubi. Butong maoy padaghana. Ug tanom ug imong kaugalingong lubi kay tag-baynte pesos na ra ba ang usa ka butong kung imong paliton diha sa mga eskina sa syudad. Motumpang pud ang presyo sa butong sa presyo sa bottled mineral water. Kapait.
Mobalik ra lagi gihapon ta sa agriculture ani.
Linkback:
https://tubagbohol.mikeligalig.com/index.php?topic=21053.0