Nagsingabot na ang kagbahion. Human sa tibook adlaw nga panaw, ang Haring Adlaw paingon na usab sa pagtikyop sa iyang halangdon nga silaw.
Dungan niini, naghinay na usab sa pagpamauli ang lapoy nga nga kaunuran sa mga mag-uuma gikan sa tagsa -tagsa ka mga umahan. Nagsugod na pag pang siga ang mga lampara ang tagsa-tagsa ka nga balay samtang nagakawala na ang katapusang badlis sa silaw sa kasadpan.
Laing gabii na usab ...
Taliwala sa makabungog nga kamingaw, hinay hinay nga gibungkag ang maong kahilum sa huni sa mao-pa-lay pagkaskas nga gitara. Nakig-ambit usab sa maong huni ang awit sa mga pispis sa ilang way kupas nga pag-awit panahon sa paghabol sa kangitngit. Niambit usab sa maong huni ang mga baki sa ilang tagsa-tagsa ka mga buho. Sa katapusan, imong maaninawan ang nagsingabot nga mga nagsigang sulo (nga hinimo sa lukay ug takong).
"Maayong gabii" maoy timbaya usa sa mga bag-ong niabot. "Maayong gabii sab" balik nga pagtimbaya ni Nang Pitang. "Usa ka bol nga tuba Nang Pitang" maoy hangyo ni Isyong.
Usa ka bol. Ikaduhang bol. Ikatulong bol. Naglibot libot na usab ang baso sa pagtagay sa matam-is nga tuba ni Melchor nga kaganina lang gihatud sa tindahan ni Nang Pitang. Nagakadugay, naga katam-is ug naga kalami ang tagay. Ang nagakalawon na nga kagabhion giubanan na usab sa naga kakusog nga mga tingog sa mga tigulang ug mga batan-on nga nagaalirong sa "petromax" sa maong tindahan. Sadya kaayo ang maong panagtigum bisan tuod sa tibook adlaw nga pagpangabudlay. Sa hinay-hinay gikuha ni Edot ang iyang sista ug gikaskas na ang unang nota sa iyang paboritong harana.
"Didto ko sa atong lagkaw, akong gisusi akong giduaw. Wa pa gyuy diyutay'ng kadaut bisan sa dugay nang mga adlaw. Abi ko ug naguba na, tun-as, nabungkag ug nawala na. Nagpabilin pa gihapon nga buhing saksi sa gugma ta...."
P.S.
(ipadayon sa sunod nga hugna ....)
Linkback:
https://tubagbohol.mikeligalig.com/index.php?topic=1950.0