MikeLigalig.com

Nangihi, gidumog ug gikawras og tiguwang nga babaye


COTABATO CITY -- Usa ka 39 anyos nga lalaki ang gihasi sa usa ka tiguwang nga babaye alas 2:00 sa kaadlawon kagahapon.

Giila ang biktima nga si Dick Abdul, minyo ug molupyo sa Sitio Biniroan, Barangay Poblacion 9 sa dakbayan.

Sumala sa asoy ni Abdul nga nangihi lamang siya gawas sa ilang bay niadtong orasa, apan kalit lang siyang giduol sa usa ka daot nga tigulang nga babaye, taas og buhok ug dunay mga bangkil ug gidumog siya ug gikawras.

Apan sa dihang misayagit ang biktimba ug nangayo og tabang sa iyang asawa ug mga silingan, ug matod pa niini kalit lang nga nahimong langgam nga itom ang tigulang ug milupad palayo kaniya.

Si Abdul ang dali nga gidala sa iyang pamilya ngadto sa City Health Office sa dakbayan ug gitambalan ang mga samad nga naangkon agi sa kawras ug pinaakan nga daw ngipon sa tawo.

Apan dunay nagduda nga posibleng ang biktima gikan nag-inom ug buntag na nga nakauli sa ilang bay, hinungdan nga gikulata sa iyang asawa.

Apan sa pakighinabi sa asawa sa biktima nga si Bai Tayan Abdul, gikanayon niini nga nangihi lang ang iyang bana sa diha nga iya kining nadungog nga misiyagit ug nangayo og panabang.

Gipasusi na ni Cotabato City Mayor Japal Guiani sa kapulisan kon unsa ang mi-atake sa biktima.

Kahadlok ang gibati sa katawhan sa dakbayan, mga probinsiya sa Maguindanao ug North Cotabato tungod sa sunod-sunod nga pagpangatake ngadto sa mga tawo. (EEF)


Gipatik sa mantalaang SuperBalita Davao Hunyo 02, 2015.
 


Linkback: https://tubagbohol.mikeligalig.com/index.php?topic=80110.0