MikeLigalig.com

Ni BEN O. TESIORNA, SETH DELOS REYES ug SALGER P. DURA


ANG skinhead nahimong trending dihang si kanhi Davao City mayor Sara Duterte-Carpio mipakita sa iyang ulo nga gi-opawan niadtong Martes aron ipakita ang suporta sa iyang amahan, Mayor Rodrigo Duterte, kinsa giawhag nga molansar sa pagka-presidente sa minilyon ka mga Filipino.

Human gikastigo ang netizen nga nag-akusa niya nga hakog tungod sa pagbabag sa iyang amahan nga molansad sa taas nga posisyon sa nasud, si Sara Duterte-Carpio mipaskin sa iyang hulagway sa Instagram niadtong Martes nga nagpakita sa iyang skinhead nga dunay hashtags #Duterte2016, #kalboparasapagbabago, #NohairWecare, ug #justDUit.

Sa iyang Instagram gituohan sa kadaghanan nga ang anak nagpadayag sa iyang suporta sa tinguha ni Duterte sa pagka-presidente.

Daghan sa mga dumadapig ni Duterte nagpaupaw na sab isip suporta sa 'Duterte for President' movement.

Miyerkules sa hapon, walo ka mga konsehal sa Davao City nagkasabot nga magpaupaw sab sa barbero aron ipadayag ang suporta kang Duterte.

Si Konsehal Al Ryan Alejandre nagbutyag sa Sun.Star SuperBalita nga misugot na si Inday Sara nga modagan ang iyang amahan bisan way kwarta ug makinarya sa eleksyon.

Sa samang higayon, sila kanhi Konsehal Peter Laviña, kanhi North Cotabato governor Manny Piñol, Davao City Sports coordinator William "Butch" Ramirez, ug uban pang mga dumadapig ni Duterte dungan miadto sa barbero sa Manila aron magpagupit isip pangandam sa pagduso sa kandidatura sa mayor.

Usa ka kasaligan nga tinubdan, kinsa naghangyo nga di isuwat ang pangalan, nagpahibalo sa SuperBalita nga 100 porsiyento nga modagan si Duterte.

Apan, samtang gisuwat kining balita, wa pay opisyal nga pahayag nga gipaguwa ang kampo ni Duterte kung moduso karon ang mayor sa iyang COC sa pagka-presidente.

Kahinumdoman, niadtong miaging Biyernes gibutyag sa mayor nga kung moadto siya sa Comelec Manila sa Oktubre 15, pagka-presidente ang iyang daganan.


Gipatik sa mantalaang SuperBalita Davao Oktubre 15, 2015.

another showbiz gimmick?  what for, pataktak sa kuto ug kaspa?  really, our political gimmicks are wearying...