MikeLigalig.com

Ni STEPHANIE V. BERGANIO


WALAY higayon nga makaboto ning umaabot nga eleksyon sa Mayo 9 ang tanan nga mga piniriso sa Misamis Oriental Provincial Jail (MOPJ).

Kini ang gibutyag ni Jail Warden Dominador Tagarda ug miingon nga niadto pang niagi nga eleksyon niya gipaningkamotan nga mahatagan og katungod ang mga piniriso nga makaboto ug iya na kining gisango sa Commission on Election (Comelec).

Apan daw wala kini gi-kater sa ahensya tungod kay ang mga piniriso nagpuyo sa lain-laing kalungsoran o lain-lain ang ilang mga puloy-anan dili susama sa mga piniriso sa Cagayan de Oro City Jail nga pulos mga residente sa dakbayan.

Usa ka bag-ong piniriso nga si Roy (apeliydo gitago), nibutyag sa interbyu sa Sun.Star SuperBalita, niingon nga medyo nadismaya nga dili siya makaboto tungod kay niaging eleksyon nakabotar pa siya sa ilang lungsod apan dili ning umaabot nga eleksyon.

“Bisan bitaw naa mi sala, naa sab mi katungod nga magbotar baya kay para lakip pod mi sa interaksyon sa komunidad,” butyag niini.

Dugang usab ni Roy nga unta mapangitaan kini og solusyon nga sa sunod nga eleksyon makaboto na ang mga pinirisio sa MOPJ.

“Unta pangitaan nila og solusyon labina ang Comelec,” butyag niini.
 
Ang Comelec-Northern Mindanao wala pay reaksyon kalabot sa maong sugyot.


Gipatik sa mantalaang Superbalita Cagayan de Oro Abril 26, 2016.

Linkback: https://tubagbohol.mikeligalig.com/index.php?topic=82225.0