MikeLigalig.com

Minilyon nga Bayanihan grant sa LGUs
gipagawas sa nasudnong kagamhanan

CORTES, Bohol, April 13, 2020 (PIA)—Aduna gyuy igo nga pundo nga magamit sa local nga mga kagamhanan sa pagpahiluna sa ilang mga komunidad aron mapasayun ang kahagip-ot dala sa coronavirus disease.

Kini sanglit gipagawas na sa Administratsyon ni Presidente Rodrigo Duterte ang pinansyal nga tabang nga gitawag og “Bayanihan Grant to Cities and Municipalities,” nga magamit sa mga opisyales aron pagtubag sa mga panginahanglan batok sa COVID-19, segun pa sa taho sa Department of Budget and Management (DBM).

Dugang sa ahensya nga maoy engkargado sa pagpahiluna sa  mga pahat nga angayan sa mga local nga kagamhanan haum usab sa ilang buhis nga nakolekta ug sa ilang kita, ang hinabang katumbas sa usa  ka buwan nga Internal Revenue Allotment  (IRA).

Ang lakang sa Presidente nahilakip na sa mga lakang nga sukip sa dugang gahum nga gitugyan sa Presidente dihang gipasa sa Kongreso ang Republic Act 11469  o ang Bayanihan to Heal As One Act.   

Sa mga taho nga napalik sa local nga mga pamantalaan, matud pa ni Department of Interior and Local Government (DILG) Undersecretary Jonathan Malaya, "Kining hinabang makaayo alang sa tanan nga local government units sa tibuok nasud, sila nga nakabati na sa kalisud ilabi na sa pagtubag sa panginahanglan sa ilang mga residente.

Kini usab human daghan na nga mga local officials ang nanawagan sa nasudnong kagamhanan sa hinabang alang sa minilyon nga Pinoy nga nagsalig na lamang sa rasyon ug pagkaon nga hatag sa kagamhanan tungod sa mga napaundang nga trabaho dala sa enhanced community quarantines nga gihabol sa mga lugar sa Luzon, Visayas ug Mindanao.

Ngani, ang ECQ, giuswag pa hangtud sa Abril 30, segun pa sa deklarasyon sa Presidente.

Ubay pa usab niini, mipadayag ang Land Bank of the Philippines sa ilang pasilidad alang sa pautang nagdto sa mga local nga kagamhanan samtang gibuksan sa bangko ang P10-bilyones nga emergency loan assistance program alang sa LGUs.

Segun pa sa mga tinubdan sa LBP, ang pahuwam adunay fixed interest rate sa 5 porsyento matag tuig, ug mahimong bayaran sulod sa lima ka tuig, us aka tuig nga grace period sa pagbayad sa principal nga kandtidad niini.

Ang pautang, maggahum sa mga local nga kagamhanan nga probinsya, syudad, ug municipal sa ilang dinali-an nga pagpamalit sa mga pagkaon ug pagbayad sa mag serbisyo nga may kalambigitan sa COVID-19.

Subay usab niini, ang kagamhanan sa Bohol mipadayag sa iyang giandam nga P150 milyones nga  kaugalingon nga bersyon sa Social Amelioration Program.

Niini, may mga 300,000 ka banay ang makakuha og P500 nga food vouchers nga ikapamalit sa mga nag-unang panginahanglanon sa balay.

Segun sa taho, kasamtangan pa nga nakigsabut ang Kapitolyo sa mga mayor, kinsa maoy natahasan sa  p g-tumbok sa mga benepisaryo sa food aid.

Hinoun, wala pa masayri kon ang P150 milyones nga lakip sa P700 milyones nga kinatibuk-ang pundo alang sa giingon nga “We Survive as One Fund sa Bohol,” mao na ba kini ang pundo nga gihatag sa nasudnong kagamhanan nga katumbas sa kinatibuk-ang IRA sa mga LGUs dinhi.  (rahchiu/PIA-7/Bohol)

*WORK from HOME and START YOUR OWN blog site, business or personal website, or e-commerce store at www.dreamhost.com



Linkback: https://tubagbohol.mikeligalig.com/index.php?topic=93358.0