SA adlaw sa piniliay, hinumdomi ang mosunod:
- Ang hulagway sa mga bata nga naglaruylaroy ug nagpakilimos sa kadalanan, hinikawawan sa kaugmaon.
- Ang mga pamilya nga nabungkag tungod sa panaglagyo kay ang asawa o bana nanimpad sa laing nasud resulta sa kakuwang sa kahigayonan dinhi sa yuta ta nga natawhan.
- Ang liboan sa atong mga kaigsuonan nga tungod sa kaubos na sa ilang pagtan-aw sa kaugalingon tukmod sa kalisod, mosugot na lang maghubo atubangan sa webcam bugti sa ipadala kanila sa ilang ka-chat nga langyaw.
- Ang kadugay sa pagproseso sa mga papeles sa mga buhatan sa gobyerno, ang way katapusan nimo nga pag-follow-up kay dili molihok ang makinilya kung way padangog.
- Bisan tuod dili mahimo sa gobyerno ang tanan — dako ang kadaot o kaayo nga mahimo sa gobyerno sa imong kinabuhi ug sa imong isigka Pilipino.
- Ang Maguindanao Massacre isip simbolo sa kahakog sa gahom.
- Ang mga sugilanon sa inhustisya – mga gidaugdaog nga mamumuo, mga way gikaon nga mag-uuma ug uban pa.
- Nga bakak nga gipatuo sa uban: nga di na modangat ang kausaban. Ang tinuod - way kausaban nga mahitabo hangtod nga dili mausab ang imong hunahuna. Kon nilambo ang atong mga silingang nasud, way rason nga dili ta makaaginod sa unahan.
- Nga dili kabubut-on sa Ginuo nga mokamang tas tumang kalisod — ug mamatay sa kagutom ang uban natong igsuon — tungod kay Siya mahigugmaon. Sa hataas na nga higayon ang mga pulitiko ang atong gitugtan nga mohulma sa ugma sa atong kinabuhi. Kita mismo ang makabugto sa gapos.
- Nga dili ang propaganda sa telebisyon ang mohaw-as ning atong nasud sa kalisod kon dili ang usa ka gobyerno nga moabli sa mga oportunidad, ug kini mahimong posibli ubos sa liderato nga ligdong ug dili korap.
- Nga wa magkuwang kining atong nasud sa mga lider nga gradwado sa Harvard, o maayo manulti, o may lapad sa kasinatian sa natad sa pulitika, o sa maayo moduma ug negusyo, o maayo moarte.
- Nga kon way kalainan ni Arroyo ang molingkod sa Malacanang sa 2010, kini nagpamatuod lang sa giingon ni Edmund Burke - “Ang hinungdan nganong ang dautan molampos mao ang maayong tawo nga way gihimo.“
- Nga ang P 300 o P500 dali ra kaayong mahurot.
Balaan ang katungod sa pagpili.
Linkback:
https://tubagbohol.mikeligalig.com/index.php?topic=25064.0