CHATTO NEGATIBO SA DRUGTEST; CHE MITAGO-MITALAW!
NEGATIBO sa ginadiling drogas si Gov. Edgar Chatto basi sa resulta sa boluntaryo niyang pagpa-drug test sa Gov. Celestino Gallares Memorial Hospital (GCGMH) ug Kampo Dagohoy kagahapon, Lunes, Marso 25.
Bisan og gilauman nang daan sa mga Bol-anon ang maong resulta, kini sa laing bahin dakung tamparos kang Carmen Mayor Conchita De los Reyes nga nanglingla sa katawhan nga si Chatto ug kaubanang opisyales sa probinsiya ang nagpakuyanap sa drogas sa Bohol.
“Nitago ug nitalaw†ang kaatbang sa gobernador kay way bisag iya na lang anino nga nipatim-aw sa GCGMH aron modungan sa pagpa-eksamin ug mapamatud-an kon kinsa gyud kanila ang posibleng maoy protektor sa drogas o nahungog sa bisyo.
Sa iyang paghagit kang De los Reyes niadtong Biyernes, giklaro ni Chatto nga ang drug test ipaagi usab sa sampol sa buhok—dili lang ihi, laway ug dugo—kay mas dugay mamawa sa buhok ang ilhanan sa paggamit og drogas.
Ang resulta nagmatuod usab sa moral ascendancy ni Chatto isip amahan ug numero unong lider sa probinsiya kansang karakter gidayeg ug gipasigarbo sa mga Bol-anon.
Ang drug test ngadto sa gobernador gisaksihan sa Bohol Tri-Media Association (BTMA) pinangunahan sa presidenteng si Fred Araneta sa DYRD, Philippine Drug Enforcement Agency (PDEA) – Bohol Unit chief agent Ma. Chona Egam, GCGMH chief Dr. Nenita Po ug laboratory head Dr. Juanita Arcay.
Didto usab ang mga tinugyanan sa Philippine National Police (PNP) Crime Laboratory aron mausa ang pagkuha og mga sampol para sa lina-in nilang eksaminasyon sa Kampo Dagohoy.
Nisamot kalig-on ang moral authority sa gobernador sa boluntaryo niyang pagpa-drug test nga nagpakitang way lama sa ginadiling drogas ug hilabihan kasalawayong bisyo ang iyang pagkatawo ug pagka-opisyal sa kagamhanan.
“Kon seryoso man ugaling ta sa adbokasiya batok sa ginadiling drogas, kinahanglang magsukad kanato ang kamatinud-anon,†nagakanayon ang gobernador.
Iyang gihagit di lang ang mayor sa Carmen apan ang tanang uban nga nagpatoong seryoso sa kampanya batok sa pagpayuhot og drogas sa pagbuhat usab sa ingon.
Tak-om ang baba ug wa na igdungog ang babayeng pangulo sa nagpaka-aron-ingnon nga tarung nga grupong Bag-ong Bol-anon human siya “imbitaha†sa gobernador nga magdungan sila sa pagpa-drug test sa GCGMH aron mapapas ang unsa mang pagduda taliwa sa grabeng intriga ug pamakak.
Ang survey sa programang Radyo Merkado sa DYRD niadtong Sabado nagbutyag sa hingpit nga pagsaway sa mga tawo sa matud nila labaw ka-iresponsable ug “naliso-an†na nga pamahayag ni De Los Reyes.
Aduna gani mga survey respondent nga nanawagan kang De los Reyes sa pagsumitir usab sa iyang kaugalingon sa usa ka “eksaminasyon sa utok.â€
Ang pagtanyag ni Chatto sa kaugalingon nga ipa-ilawom sa drug test gihulagway sa katawhan nga usa ka klarong pagpasabot nga kinsa kadtong nanguna sa pagsumpo sa ginadiling drogas angay lang nga way bisag gamayng mansa sa pagduda.
Ang drug test sa gobernador nga gisugdan pasado alas onse sa buntag kagahapon gisakshihan usab ni Provincial Administrator Alfonso Damalerio II. (Ven rebo Arigo)
Linkback:
https://tubagbohol.mikeligalig.com/index.php?topic=71678.0