MikeLigalig.com

25 ka tuig human sa Pilipinhong Pag-alsa sa EDSA I

Unsa na bay nabag-o ug nakab-ot nga kadaugan sa katawhan human sa 25 ka tuig na nga milabay? Matod pa nahibalik ang “demokrasya” ug “kagawasan” nga gihikaw sa usa ka diktador. Aduna nay katungod ang katawhan sa pagpadayag sa ilang mga huna-huna, panahom ug kritisismo ngadto sa gobyerno nga walay kahadlok nga mabilanggo. Libre ang prensa o media sa pagmantala sa mga balita ug opinyon. Mipatigbabaw ang gahum sa gobyernong sibil, napalagpot ang pinakakurap nga lider sa kasaysayan ug posibleng daghan pa.

Apan, nakab-ot ba ang tinuoray nga DEMOKRASYA - gikan sa pinulungan nga Grego nga  gikan sa dÄ“mos-katawhan ug kratos-gahum. Karon, adunay katungod ang katawhan nga mopadayag , apan kini gipaminaw ba sa mga namunuan? Gawasnon kang mag-organisa ug magprotesta apan nagkadaghan ang biktima sa politikanhong pagpamatay, gigamagamaan og kaso ug napailawom sa surbeylans ug harassments. Gawasnon na ang prensa apan nagkataas ang ihap sa biktima sa pagpamatay sa ilang han-ay. Nawagtang ang nailang labing korap sa kasaysayan sa Pilipinas, apan migrabe, midaghan ug nagkagarapal usab ang korapsyon karon sa atong panggobyerno. Natangtang ang langyaw’ng base militar apan misamot ang grabeng pagkadepende nato sa langyaw’ng gahum ug pagpailawom sa mga palisiya niini. Mas grabe ang kalisod sa nasud, padayong atrasado ug susamang mga agalong yutaan ug lokal ug langyaw’ng  kapitalista pa gihapon ang nagpahimulos sa bahandianon tang nasud taliwala sa kalisod sa dakong bahin sa katawhan.

Duha na ka pag-alsa sa EDSA ang atong naagian, kini parehong nakapalagpot ug nakapausab sa pamunuan sa panggobyerno. Mapasigarbahon kita sa tibuok kalibutan sa atong nakab-ot nga kadaugan pinaagi sa atong panaghiusa ilawom sa bandila sa patriyotismo, demokrasya ug kagawasan batok sa bangis ug korap nga mga pamunuan. Napakita nato ang tinuod gahum sa katawhan, ang tinuod nga demokrasya, anaa sa kamot sa katawhan ang pagbag-o sa katilingban.

Unsa bay kulang sa EDSA? Nakontento ra kitang mailisan ang pamunuan apan gipasagdan natong motunhay ang katilingbanong sistema, ang sistemang nangibabaw ang interes sa pipila ug interes sa langyaw’ng gahum.

Ang bag-ong pamunuang P-noy adunay mga slogang “matuwid na daan”, “walang mahirap kung walang korap” ug “kayo ang boss ko”. Gisundan niini ang naila usab nga pinakagarapal nga pamunuang naputos sa kontrobersya sa korapsyon, kabangis, pagpanikas ug maniobra.  Gikinahanglang ipursige sa katawhan ngadto sa bag-ong pamunuan ang seryosong mga lakang alang sa malahutayong reporma ug kausaban ilabi na sa hisgutanan sa palisiya sa atong ekonomiya, sistema sa politika, langyaw’ng relasyon ug sa kuyanap ug nagkalawom nga korapsyon sulod sa burukrasya.

Gikinahanglan sa katawhang Pilipino ang diwa sa EDSA, ang diwa sa Panaghiusa, Patriotismo ug Paghigugma ug Sakripisyo alang sa Kagawasan ug Kausaban aron dugang pakigbisogan ang pagkab-ot sa tinuod nga demokrasya ug kagawasan. Gikinahanglan nato ang lagpas pa sa EDSA, gikinahanglang nato ang mas pursigido ug maduotong panaghiusa ug pakigbisog alang sa mabulukong reporma ug kausaban. 
 
SGD JOHN RUIZ

Secretary General

Linkback: https://tubagbohol.mikeligalig.com/index.php?topic=38138.0