Written in 2001 after college
Tudloi Kining Mga Tudlo Sa Paghikalimot
balak gisulat ni Mike Ortega Ligalig (from the vault of his old poems)
1
Ang akong mga tudlo nahikalimot na sa kahumot
sa imong gininhawa. Gisubay ko ang imong mga ngabil
apan wala ko na makita ang alimyon sa imong talidhay,
hinuon mao na lay nagpabilin ang bakak mong mga pulong.
2
Ang akong mga tudlo buot mokab-ot sa imong aping
ug sa dihang mipilit akong panit sa imong panit
wala koy laing nasimhot kon dili ang katab-ang
sa imong pahiyom - ug ang nangamig mong pagtagad
mikuyanap sa tibuok kong mga palad...
3
Gani sa imong mga mata mialisngaw ang kabugnaw
sa pinitik sa imong kasing-kasing - ug maoy mipalong
sa nagsilaob ko untang kamingaw kanimo...
4
Asa na ang dinagaang sa imong parayeg?
Asa na ang katam-is sa imong pagdayeg?
Asa na ang pagtaob sa imong dughan?
5
Ayaw itukmod kining alimpatakan diha sa bung-aw
sa mga paghandom kay diha sa ngilit akong mahanduraw
ang nagdagtom tang kagahapon, hinuon tudloi pag-usab
kining mga tudlo pagsubay ngadto sa dalan sa kalimot
Book online travel tickets in Asia, Australia and New Zealand at:
https://12go.asia/?z=3467325Linkback:
https://tubagbohol.mikeligalig.com/index.php?topic=91104.0