MikeLigalig.com

HINIKAWAN

Ang pagpaabot nga moabot,
Usa ka langyaw nga pasalig
Gipahumtan sa kahidlaw,
Gihidhirag balsamo
nga makagiyon,
Ug, gialam-alaman
ang pagsalimuang;
Gibanhaw ang mga adlaw nga gibulad
sa desyerto,
Pakyas ang mga damgo nga nagkalidades,
Apan naglabi sa nagpakita pulos makahahadlok ang mga dagway,
Mga buta, mga bulhog,
May mga libat, mga bakakong
mugna nga gibilad,
Salin sa kaligutgot
sa panahong nagkaguliyang sa mga utlanan nga gipang-ilogan sa katungod.

Kanus-a pa kaha magakos ang kahidlaw,
Niining nangayabag mga punoan
Nga gikatag ni Bathala?
Giyugyog ang kalibotan sa kasamok. Ug sa mga hulgaay
Patas-anay sa ihi,
Sa kawalay kaseguroan.

-- Marcelo A. Geocallo

news.mikeligalig.com



Linkback: https://tubagbohol.mikeligalig.com/index.php?topic=122856.0