MikeLigalig.com

‘GSIS Board’ gipaabot pa nga
paluston ang emergency loan

TAGBILARAN CITY, Bohol, November 13, (PIA)—Wala pa mahisguti sa Government Service Insurance System Board of Directors ang kahimtang sa pagpalusot sa resolusyon kabahin sa nadeklara nga state of calamity sa Bohol.

Kini maoy labing bag-o nga kasayuran nga napadangat sa GSIS Bohol sa pagpangumusta sa estado sa pagpagawas unta sa emergency loan sa ahensya agi og hinabang sa mga nabiktima sa kalamidad sa Bohol.

Kahinumduman nga nanghangyo si Gobernador Arthur Yap nga ideklara na sa Sangguniang Panlalawigan nga ang Bohol ipailawom na sa state of calamity sa nataho nga P179 milyones na ang kadaut sa mga umahan niadtong miagi nga buwan pa.

Ang hataas na nga lanat sa huwaw, nakadaut na sa mga kaumahan ug nakaapekto na usab sa mga daghanang panginabuhi-an sa katawhan, mao nga nagnihit na ang pagkaon.

Gipasabut ni GSIS Information Officer Sherwin Viva, nga ang emergency loan sa GSIS gitanyag alang sa mga sakop nga naapektohan sa mga katalagman.

Ang pahuwam, bayaran sa tulo ka tuig, o sa 36 ka binuwan nga data-data sa interes nga 6% matag tuig, dugang ni Viva.

Gani, mahimo usab kini nga loan nga i-renew, diin ang nahibilin nga balanse sa gihuwaman nga kantidad, ikaltas sa proceeds sa bag-ong loan.

Kinatibuk-an nga P20,000 ang makuha sa emergency loan, samtang P40,000 ang renewal niini.

Hinuon, segun sa palisiya sa GSIS, kinahanglan pa nga ang lugar nga gipuy-an sa loan applicant, deklarado nga naa sa state of calamity pinaagi sa Sangguninag Bayan o Sangguniang Panlalawigan o sa National Disaster Reduction Risk Management Council.

Hman niini, desisyonan pa usab sa GSIS Governing Board ang resolusyon nga maduso, sa dili pa kini mopagawas sa pagbukas sa loan facility.

Tungod niini, aghat sa GSIS pinaagi ni Viva, information officer sa ahensya, magpaabut sa pag-anunsyo sa GSIS kanus-a buksan na ang pagpanawat ug pagproseso sa emergency loan, subay niini.
(rahc/PIA-7/Bohol)

Book online travel tickets in Asia, Australia and New Zealand at:
https://12go.asia/?z=3467325



Linkback: https://tubagbohol.mikeligalig.com/index.php?topic=91430.0