By Rey Anthony Chiu
Bohol - PIA
Mikunhod na ngadto sa 5.9% ang kinatibuk-ang gidaghanon sa mga walay kapanarbahoan sa Kabisay-an sumala sa taho sa National Statistics Office alang sa katapusang tulo ka buwan sa milabayng tuig.
Niini, napagamay usab ang gidaghanon sa nagkuwang pa sa trabaho ngadto sa 11.3% sa 2007, ug kini nakapatala sa ikaduhang labing ubos nga stadistika sa 17 ka rehiyon sa nasud.
Niadtong 2006, ang underemployment (o kadtong nagkinahanglan pa’g dugang oras sa trabaho matag adlaw) dinhi sa Rehiyon mikabat sa 17.8%.
Matud sa taho sa NSO labor force statistics, ang nasudnong bilang sa walay trabaho mikanaug usab gikan sa 6.3% gikan sa kanhing 7.3%.
Dunang sa taho, kapin sa katungan sa mga wala pa makasulod sa trabaho sa tibuok nasud mga lalaki kinsa mitala sa 63.5% ug 46.2 % kanila taman lamang sa sekondarya ang nahuman sa pagtuon.
Sa kinatibuk-ang Pilipinas, ang Cagayan Valley maoy may labing taas nga natala nga bilang sa napasulod sa trabaho diin ilang nakuha ang 97.7 % samtang ikaduha ang Central Visayas sa 94.1%.
Dugang sa taho, sa gibanabana nga 35.9 milyones ka mga trabahante sa nasud, 93.7 % niini may kasamtangan na nga trabaho.
Kini usab nagpasabot nga 9 sa 10 ka tawo, may trabaho.
Linkback:
https://tubagbohol.mikeligalig.com/index.php?topic=8187.0