Ni Rey Pasaporte (Banat) Updated March 02, 2011 12:00 AM Comments (0) View comments
CEBU, Philippines - Unom ka tawo ang nangaangol human nadat-ogan sa punoan sa mangga sa
dihang kalit kining naluka pasado alas-3 sa miaging hapon diha sa sitio Riverside sa barangay Sapangdako siyudad sa Sugbu.
Ang unom pulos mga drayber sa habalhabal kinsa niadtong higayona naghantak samtang naghuwat
og pasahero nga sila si Cleo Avilla, Clifford Monera, Willy Cabajar, Rolando Hayag, George Reno Daclan ug Jave Enarita.
Gihulagway nga dili magakos og tawo ang lawas sa punoan sa mangga nga gihulagway sa mga
residente sa dapit nga karaan na kaayo ug giingong ‘taw-an’ tungod sa mga katingalahan nga
ilang makit-an ilabina panahon sa kagabhion.
Atol sa maong pagkatumba nadat-ogan usab ang tindahan nga gipanag-iya ni Roseni Eustaqio
ug ang multicab nagtangag sa plakang YES-981 nga gipanag-iya ni Barlito Avilla nga giparking diha sa daplin sa karsada.
Si Leliosa Nabesis, residente sa dapit nga nahinabi sa mga tigbalita mitug-an nga nagtuo siyang
gibiyaan na sa nagpuyo nga ‘dili ingon nato’ ang maong mangga maong natumba kini bisan walay kusog
nga hangin ug uwan niadtong Domingo hangtud sa Lunes.
Si Nabesis nga nagpuyo sa maong lugar sukad niadto pang 1974 kanunay nang makadungog nga
dunay nagpuyo nga ‘dili ingon nato’ diha sa maong mangga.
Si Delia Torrentira, bayaw ni Barlito Avilla ug maoy nagbantay sa tindahan nga gipanag-iya ni Avilla
diin nahimutang kilid sa tindahan ang punoan sa mangga mitug-an sa Banat News nga natulog siya
niadtong higayona sa dihang natumbahan sa mangga ang tindahan
Matud ni Nabesis nga si Cleo Avilla maoy nasamad sa tuong bahin sa agtang ug tangkugo,
samtang si Monera nakaangkon og bali samtang ang uban niini duna say gipamati sa ilang kalawasan. (BANAT NEWS)
Linkback:
https://tubagbohol.mikeligalig.com/index.php?topic=38401.0