MikeLigalig.com

Saturday, June 9, 2012


NAGKALAIN-LAING sektor, mga asawa ug uban pa ang positibo kaayo sa desisyon sa House Representatives human giaprobahan niadtong Miyerkules ang bill pagpataas sa buhis sa sigarilyo ug mga produkto sa mga ilimnong makahubog.

Pipila ka asawa nga adunay magsige og inom–inom nga bana ang malipayon kaayo niini tungod kay kini na ang panahon nga limitahan sa ilang mga bana ang pagsige og inom.

Usa sab ka personahe sa Roads and Traffic Administration (RTA) nga nahinabi sa SuperBalita niingon nga makatabang usab kini nga moubos ang kaso sa bangga diha sa kadalanan.

Sa laing bahin si City Councilor Dante Pajo kinsa chairman komite sa katilingbanong panglawas sa niingon nga ang maong balaodnon makatabang sa pagpalig-on sa maayong panglawas sa katawhan sa nasod ug makaubos usab sa sakit diin usa sa top ten fatality.

Kung motaas na ang presyo sa sigarilyo ug mga ilimnon dako ang posibilidad nga mapwersa sa pagbiya sa ilang bisyo labina niadtong gamay lamang kaayo ang income.

“I just hope that the Senate will give their revision the soonest so President Benigno Aquino III can sign it and turn it into law,” matud ni Pajo.

Sa iyang bahin usab ni Jun Galban, spokesperson sa Department of Health, niingon nga nihulat sila sa positibong desisyon niini labina anaa sila sa likod niini nakasuporta.

Basi sa nakalatid sa bill, gilaumang mosaka ang presyo sa alcohol products ug sigarilyo ug nalantaw nga maka-contribute og P33 billion sa government revenues.

Ang gi-proposed nga maghatag og three-tier tax rates sa P20, P80 ug P320 sa distilled spirits sama sa whiskey, brandy, rum, gin ug vodka; two-tier tax ang gikatakda sa sparkling wines ug champagnes sa P250 ug P700; ug two-tier tax rates sa kantidad nga P13.75 ug P18.80 sa fermented liquors.

Ang mga sigarilyo nga nagkantidad og P11.50 o ubos pa niini ang mabaligya na sa ta P23.50, samtang ang sigarilyo nga nagkantidad og P11.50 pataas ang mapalit na dayon og tag P31.80.

Kahinumduman nga usa kini nga balaod nga giingong gimando ni Presidente Benigno Aquino nga paspas nga hisgotan sa Kongreso aron mapasar. (SVB/NJM)

Gipatik sa mantalaang SuperBalita Cagayan de Oro Hunyo 09, 2012.

Linkback: https://tubagbohol.mikeligalig.com/index.php?topic=51184.0