MikeLigalig.com

Ni EMIR C. BARIQUIT


GENERAL SANTOS CITY -- Patay na nga narespondihan sa mga kabanay ang usa ka ginang sulod mismo sa iyang balay human gigulgol sa bana ang liog didto sa Purok Kulasi, Barangay Labangal kagahapon sa buntag, Hulyo 22.

Giila ang biktima nga si Jovelyn Roquelio o alyas Fatima Ola (sa Muslim nga pangalan), samtang ang bana nga suspek mao si Abdul Jobfer Ola.

Nasayran nga nakahiagum ang biktima og duha ka lawom nga samad ginulgolan sa liog gamit ang sundang.

Sa imbestigasyon sa Makar Police Station sa pagpanguna ni Senior Police Officer 1 (SPO1) Rex Diongon, nasayran nga alas 2 sa sayong kaadlawon niadtong Martes nag-away ang magtiayon atubangan sa ilang duha ka mga anak tungod nagselos ang bana.

Tungod sa grabeng kasuko ug nagkalalis, gikuha matud pa sa suspek ang sundang sa gawas sa ilang balay ug gisulod ang asawa nga naghigda sa ilang kuwarto ug dayong gigulgulan sa liog, hinungdan sa iyang kamatayon.

"Grabe ka lalom ang samad, Mir, sa liog sa asawa kaduha gyud gigulgol ba, wala sa tarong nga panghunahuna ang mihimo aning krimen," saysay ni Diongon.

Human sa panghitabo, misibat gilayon ang bana ngadto sa wala matinong direksiyon.

Narekober sa Scene of the Crime Operatives ang sundang nga maoy gigamit sa suspek sa pagpatay sa iyang asawa.

Sutaon karon sa kapulisan ang tinuod nga hitabo nga posibleng anaa sa impluwensiya sa gidiling druga ug ilimnong makahubog ang suspek nga bana.


Gipatik sa mantalaang SuperBalita Davao Hulyo 23, 2015.

Ana lang kasayon sa iyaha ang mopatay ug tawo? mura'g manok? kalooy pod oi... unta mahatagan ug hustisya iyang kamatayon.. by the way, harsh ra gyud kaayo ning title sa headline ba...