Ni Rey Pasaporte (Banat) Updated January 14, 2012 12:00 AM
CEBU, Philippines - Usa ka ginang nga manumoray og udlot sa lukay nga himuonong puso ang gipusil sa iyang ‘kabit’ nga biyudo kinsa nag-unay sad og pusil sa iyang kaugalingon kagahapon sa alas-12:45 sa kaadlawon diha sa eskina sa dalan Tupas ug Tres de Abril St., sa barangay Pahina San Nicolas sa dakbayan sa Sugbu.
Pangabubho ang hinungdan nga gipusil ang biktimang si Marlyn Calago,39, taga barangay Pawa sa lungsod sa Dumanjug sa suspek nga si Roberto Gingoyon, 57, taga barangay Kang-Actol sa samang lungsod kinsa nag-unay sad og pusil sa iyang ulo ug namatay sad. Matud pa nga nagduda ang suspek nga may laing gikabuangan ang biktima sa kasikbit nga barangay sa ilang lungsod.
Nakuha sa mga imbestigador ang .45 nga kalibre sa armas, magazine nga may lima ka buhing bala, walo ka basiyo sa maong bala, usa ka slug sa wala pa matinong kalibre sa armas, laing magazine ug usa ka one whole yellow pad ang nakuha sa bulsa sa suspek nga gisuwatan sa iyang suicide note.
Si Calago nakaangkon og daghang samad sa iyang kalawasan, bukton lakip sa walang kilid nga gituohan sa kapulisan nga maoy gikamatyan niini. Samtang si Gingoyon nagpusil sa luyong bahin sa iyang ulo ug milapos ang bala sa iyang alimpos.
Sa pasiunang imbestigasyon nila ni SPO4 Alex Dacua, PO2 Leroy Baguio ug PO1 Esmer Escultor sa Homicide Section sa Cebu City Police Office (CCPO), usa ka Renalda Allanic, 30, nga silingan sa biktima mibutyag sa kapolisan pagkahuman og diskarga sa biktima sa mga lukay miabot ang suspek nga hubog dayong ingon “Peste kang bayhana ka pwerte na nimong lataa!â€
Pagkahuman niini mibunot ang suspek sa iyang dalang armas ug nagpasalba hinungdan sa pagdinaganay sa mga tawo ug gisundan dayon og nagsunod nga buto. Dihang ilang gisusi naglimbuwad na ang duha sa dalan.
Si PO2 Baguio nga nahinabi sa Banat News nagkanayon nga subay sa nakasaksi sa hitabo nga human mahurot sa suspek nga usa ka magazine sa pagpasalba ug pagpusil sa biktima nag-ilis kini og laing magazine ug gipusil ang iyang ulo. Ang unod sa suicide note, matud ni Baguio nga gisuwat sa suspek nangayo nang daan og pasaylo sa iyang mga anak, ug mga kabanay sa nahimo niyang mga sala.
Matud ni Baguio nga mianha sa ilang buhatan kagahapon sa buntag ang duha ka anak babaye sa suspek ug mitug-an kanila ang usa nga nakakita kini pagsuwat sa ilang amahan sa maong yellow pad nga papel niadtong nangaging mga adlaw apan wala kini magtuong suicide note na diay kadto.(/EIM) (BANATNEWS)
Linkback:
https://tubagbohol.mikeligalig.com/index.php?topic=45636.0
Topic: Tungod sa tumang pangabubho gipatay ang hinigugma unya naghikog sad diha-diha (Read 1110 times)