Ni Guam P. Logroño
Saturday, July 9, 2011
UTOK sa welder nituasik human siya naligsan sa dumptruck samtang driver sa motorsiklo kritikal human sa bangga sa miaging buntag sa highway Brgy. Arpili, lungsod sa Balamban, Sugbo.
Si Daryl Dave Timoteo, 22, ulitawo, taga Sitio Segra, Barangay Buanoy, Balamban, namatay diha-diha human napasok sa motorsiklo ug naligsan sa gikasugat nga dump truck (YEY-255) nga gimaniho ni Richard Cañete Rayno, 37, minyo, taga Brgy. Kalubihan, dakbayan sa Toledo.
Samtang seryoso ang kahimtang sa driver sa motorsiklo nga si Vicente Cantabaco, 22, way trabaho, silingan sa namatay, human makaangkog mga kadaot sa kalawasan dihang nalagpot.
Si PO3 Cesar Climaco, desk officer sa Balamban police nga gikahinabi sa Sun.Star Superbalita, niingon nga ang mga biktima padulong namopauli sa ilang lugar dihang gikasugat ang dump truck nga nagpaingon sa dakbayan sa Toledo.
Giingong pwerting kusuga nga nakapadagan ni Cantabaco ug pag-abot sa nahisgutang lugar nawad-an sa control sa manubila dihang slide ang ligid tungod sa mga bonbon sa karsada.
Nisarasay ang motorsiklo ug nisulod sa pikas lane ug napasok sa dump tuck nga gikasugat.
Sa kakusog sa impact, si Cantabaco nalagpot samtang si Timoteo napasok sa ilawom sa trak ug naligsan.
Human sa insidente, si Rayno nitahan sa kapulisan sa Balamban ug kasamtangang gitanggong samtang gihikay ang tukmang kaso batok kaniya.
Matod ni Climaco nga ang motorsiklong gihulman sa mga biktima wa na mahitsura tungod sa kakusog sa impact sa pagkabangga.
Gipatik sa mantalaang SuperBalita Cebu Hulyo 10, 2011.
Linkback:
https://tubagbohol.mikeligalig.com/index.php?topic=42177.0
