Ni Flor V. Querubin
Friday, June 24, 2011
NAGKADAIYANG eksena pahitabo sa punerarya diin kasamtangan gihipos kadtong lawas sa wa pa mailhing babaye nga gituohang gi-salvage ug napalgan sa kalibunan sa Barangay Mactan, dakbayan sa Lapu-Lapu.
Moabot sa 27 ka mga pamilya ang ningduaw sa Cosmopolitan Funerals Homes, sa Pajo, Lapu-Lapu city sa pamasin nga mao kadtong babaye ang ilang gipangita.
Usa sa mga kawani sa punenarya (nagdumili sa pagpa-ila) nitug-an sa Sun.Star Superbalita nga ang 27 ka mga tawo nga nagagikan pa sa nagkadaiyang dapit sa Metro Cebu ug silingang lalawigan ang nisusi na sa lawas.
Ang lima niini pulos mga bana nga nangita sa ilang tagsa-tagsa ka mga asawa nga taod-taod na nga wa na mopauli sa ilang balay.
Apan napakyas sila sanglit di man kini ang ilang gipangita.
Usa ka nagpailang inahan ang wa makapugong sa iyang emosyon sa dihang nagligid-ligid kini og hilak sa sawog sa morgue dihang iyang nakita ang lawas sanglit dako ang iyang pagtuo nga mao kadto iyang anak nga dugay na niyang gipangita.
“Bisan og inyo pang tan-awon ang tiyan ana, naay nay tahi (operasyon),†asoy sa kawani na nikutlo sa gisulti sa nagtiyabaw nga inahan.
Sa dihang gi-abli sa mga kawani sa Cosmopolitan ang habol nga gitabon sa lawas, nasuta nga limpyo ug way agi sa tinahian ang tiyan sa babaye.
Dali nga nibarog sa iyang giligiran ang inahan ug nihunong usab sa paghilak kay di diay iyang anak.
Sulod na sa upat ka mga adlaw gikan sa pagkadiskubre sa lawas maong babaye, nagpabilin pa gihapon nga blanko ang kapulisan kabahin sa tinuoray nga nahitabo sa biktima nga adunay tulo ka mga samad pinusilan sa iyang ulo.
Nasuta nga ang maong babaye nagsul-ob og puti nga t-shirt nga adunay marka sa ngalan sa lungsod sa Moalboal, Sugbo.
Gipatik sa mantalaang SuperBalita Cebu Hunyo 25, 2011. Linkback:
https://tubagbohol.mikeligalig.com/index.php?topic=41902.0
