Ni Joy F. Tumulak
Saturday, November 12, 2011
TANGHAGA sa kapulisan ang pagkatawo sa usa ka lalake nga gipatay sa milabay nga hapon atubangan sa daghang mga tawo ug duol pa gyud sa police station.
Ang biktima wa mailhi kay way identification card hinuon dunay cellphone nga na-recover gikan kaniya apan dihang gitawagan ang anaa sa phone directory, wa sila makaila sa biktima.
Ang biktima gipusil patay sa may Sityo Magtalisay, Barangay Mabolo, dakbayan sa Sugbo kapin sa 20 metros ang gilay-on gikan sa Mabolo Police.
Ang biktima gihulagway nga kapin sa 35 anyos ang panuigon, 5’5 ang gitas-on, dunay tattoo sa dughan nga “my only one love berongque fely,†itom nga short pants, green sweatshirt ug nag-tsenilas og yellow.
Ang biktima nakaangkon og samad pinusilan sa iyang tiyan, nawong ug ulo, agi sa kalibre .45 nga pistola.
Sa pasiuna nga imbestigasyon nga gihimo nila ni SPO4 Rey Cuyos, PO3 Ruth Violango, PO3 Wetzil Berry, PO2 Nilo Aventurado ug PO2 Julius Regis sa Homicide Section nagbutyag nga nakit-an pa ang biktima nga naglakaw uban sa laing duha ka mga suspek. --
Gipatik sa mantalaang SuperBalita Cebu Nobiembre 13, 2011. Linkback:
https://tubagbohol.mikeligalig.com/index.php?topic=44264.0
