Ni Romeo T. Limpangog (Banat) Updated November 11, 2011 12:00 AM
CEBU, Philippines - Usa ka lalaking mipusil patay sa iyang kainom nga misuway unta pag-ikyas pinaagi sa pagtabok sa Mactan Channel gikan sa dakbayan sa Lapulapu padulong sa dakbayan sa Mandaue apan tungod sa kasulog sa dagat mibalik kini sa agi ug mitahan nalang sa kapolisan.
Ang suspek nga nadakpan giilang si Avelino Cañete, 56, lumad nga taga Masbate ug kasamtangang nagpuyo sa barangay Pajo sa dakbayan sa Lapulapu kinsa maoy gitumbok nga mipusil patay kang Diosdado Baga, 32, niadtong milabay’ng gabii diha sa ilang dapit.
Si PO2 John Carlo Jocotan sa Homicide Section sa kapolisan sa maong dakbayan nga nahinabi sa Banat News miingon nga sayo pa sa miaging hapon nga nag-inom ang biktima ug suspetsado sa silingan nilang tindahan ug naglalis.
Gipapauli sa asawa sa biktima si Baga aron paglikay apan giapas kini sa suspek nga nagbitbit na og armas ug dihang nakit-an si Baga nga nangihi gipusil kini makaduha ka higayon. Si Baga naigo sa dughan ug uban pang bahin sa lawas ug patay na pag-abot sa Lapulapu City District Hospital.
Matud pa ni Jocotan human sa pagpamusil miambak sa dagat sa Mactan Channel si Cañete sa tuyo nga moikyas pinaagi sa paglangoy paingon sa dakbayan sa Mandaue human mamatikdi ang mga polis.
Nagpatabang ang kapolisan sa Philippine Coast Guard pagpangita sa suspetsado diha sa dagat apan wala gyud nila kini igkita hangtod nga nahingangha na lamang sila sa pagka alas-3 sa kaadlawon didto na kini sa daplin nga nagkurog sa katugnaw.
Si Custodio Baga nga amahan sa biktima ug nagpuyo usab sa maong dapit nga nahinabi sa Banat News miingon nga nasuko ang suspek sa iyang anak tungod kay gipapauli na kini sa asawa ug wala pa mabayri ang giutang nilang ilimnon. (BANATNEWS)
Linkback:
https://tubagbohol.mikeligalig.com/index.php?topic=44232.0
