Upat ka mananagat nagduka-duka sa dagat, usa natagak, tulo napugwat; gibahis-bahisan ug gisuhid ang dagat apan ang lawas sa usa wala na gayod maugkat
Updated November 14, 2015 - 12:00am
CEBU, Philippines - Gipangita pa ang usa ka mananagat nga natagak kay nagduka-duka nga sakay sa baruto nga giguyod og motorbanca pasado alas 4 sa kadlawon niadto’ng Huwebes sa kadagatan sa Antipolo, Tuburan.
Ang mananagat giila nga si Reynold Candidisimo, 26, taga Sta Lucia, Asturias.
Sumala pa ni Senior Police Officer 2 Aldin Abay-Abay, desk officer sa Tuburan Police Station, nga nahinabi sa Banat News nga ang mananagat kuyog nila ni Jesus Gemarino, 41; Arami Gemarino, 34 ug Allan Repunte, 41, nga sakay sa baruto nga giguyod sa pump boat ni Maximo Bansiloy, 62, ug sa iyang asawa nga si Esmeralda, 61.
Matud ni Abay-Abay nga ang mananagat nigikan pasado alas 9 niadto’ng Miyerkules sa Sta Lucia, aron mamukot og hipon.
Apan sa ila’ng pagpangita og hipon naabot sila sa Kamingawan Shoal, Antipolo apan matud pa nga samtang giguyod ang ila’ng baruto nagduka-duka sila’ng upat.
Diha’ng natungod na sila sa Kamingawan Shoal kalit lang may nipaka hinungdan nga napugwat ang mga kauban ug sa ilang pagsusi nawagtang na si Candidisimo.
Gisyagitan nila si Maximo ug gisultihan nga natagak si Candidisimo hinungdan nga nituyok sila sa agi ug gipangita apan pakyas sila bisan pa sa pipila nila ka oras nga pagbahis-bahis sa kadagatan.
Matud ni Abay-abay nga human og report sa igsuon ni Candidisimo sa hitabo, ang kauban sa natagak nga mananagat nisuhid sa kadagatan aron makit-an ang ila’ng kauban. (Bryner L. Diaz/GMR)(BANAT NEWS)
Linkback:
https://tubagbohol.mikeligalig.com/index.php?topic=81371.0
