Ni Darrel Carumba (Banat) | Updated July 1, 2013 - 12:00am
CEBU, Philippines - Nalungag ang ulo sa usa ka tanod human kini pusila sa wala hiilhing kriminal nga mibanhig kaniya didto sa barangay Apo, lungsod sa Argao kagahapon sa ala 1:00 sa kaadlawon.
Ang biktima mao si Richard Oyangorin, hingkod, minyo ug tanod sa maong lugar.
Si PO3 Benjamen Gerozaga sa Argao Police Station mibutyag sa Banat News nga ang biktima nagmaniho sa iyang motorsiklo ug nagsunod sa usa ka multicab nga maoy gisakyan sa iyang asawa paingon sa lungsod aron kini motrabaho.
Apan pag-abot sa maong lugar ang suspek mikalit lang og patunga sa karsada ug gipara niini ang biktima.
Dayon gibabagan ang biktima ug paghunong sa tungod gidul-itan kini pagpusil sa ulo ug maayung pagka pisok sa agtang ug nilapos ang bala sa iyang tingkoy.
Nakit-an pa kini sa asawa human sa pagbuto-buto sa armas nga gigamit sa pagpusil sa iyang bana.
Sa iyang paglingi sa luyong bahin, natagak na ang biktima gikan sa iyang motor samtang ang kriminal dali kaayung nakadagan pahilayo sa maong dapit.
Wala na maklaro sa asawa ang kriminal tungod sa kangitngit sa palibot.
Ang biktima namatay diha-diha ug wala na madala pa sa tambalanan, samtang ang kapolisan padayon pa sa ilang imbistigasyon pagtumbok sa kriminal ug sa motibo sa maong krimen. WC (BANAT NEWS)
Linkback:
https://tubagbohol.mikeligalig.com/index.php?topic=73630.0
