MikeLigalig.com

Ni Brenda D. Batuto (Banat) | Updated October 18, 2016 - 12:00am


CEBU, Philippines - Ang Provincial Health Office (PHO) gipangayoan og report ni Bokal Christopher Baricuatro, chairman sa Committee on Health sa hunta probinsiyal kabahin sa problema na usab sa langaw sa lungsod sa Asturias.

Sa Facebook account ni Princess France, iyang gi-post nga sa ilang lugar sa Brgy. Buswang Bago sa lungsod sa Asturias ug mga silingan nga barangay, nagkinahanglan og dinaliang atensiyon tungod sa kadaghan sa langaw sa ilang dapit. Ang poultry sa lugar maoy ilang gibasol nga hinungdan sa pagdagsa sa mga langaw.

Kagahapon nangayo siya og report sa PHO kabahin niini alang sa himoon nila nga aksyon. Posibleng ang mga opisyal sa lungsod ug ang mga poultry operator ipatawag sa hunta probinsiyal aron manubag sa mga reklamo sa mga residente.

Si Dr. Niño Ismael Pastor, hepe sa public health sa PHO niingon nga nagpadala na sila og tawo nga niimbestigar. Gibutyag niya nga ang poultry owners nanghatag og iti sa mga mag-uuma aron iabuno sa ilang mga tanom. Apan wala na maato ang gidaghanon sa iti ug nabasa sa uwan hinungdan nga gidugok og mga langaw. Giingong adunay grupo nga nipirma og waiver nga dili sila moduso og reklamo batok sa poultry kay nakabenepisyo sila niini. Matud ni Ismael nga nihimo na og mga intervention ang tag-iya sa poultry samtang ang lokal nga kagamhanan sa Asturias dili makahimo og lakang kay ang reklamo igo lang gi-post sa social media o walay  nipadangat og pormal nga reklamo. (BANAT NEWS)

Linkback: https://tubagbohol.mikeligalig.com/index.php?topic=82963.0