MikeLigalig.com

Ni KRIS SIALANA


NAGLAYOG ang duha ka mga babaye human giingong nagkalalis gumikan sa politika niadtong milabay nga adlaw diha sa lungsod Tagoloan, Misamis Oriental.

Ang duha ka mga babaye gitago sa ngalan nga sila si Inday, 32, ug Bebe, 38, nga pulos lumulupyo sa Baluarte, lungsod sa Tagoloan, Misamis Oriental.

Gikabutyag nga nagkalalis ang duha gumikan sa pulitika. Gidugang pa nga wala matud pa nasayod si Bebe nga anaa matud pa kini sa listahan nga gihimo ni Inday diin anaa kini sa grupo sa kolor puti.

Gikabutyag nga samtang nag-rally ang grupo sa violet, nasuko matud pa si Inday gumikan kay nitambong kini si Bebe sa maong rally.

Daw giduolan kini ni Inday ug gisukmatan gumikan kay nganong mitambong kini sa rally sa violet nga nakalista naman kini sa grupo sa puti.

Apan gitubag kini ni Bebe sa pag-ingon: "But-anay diay? Naminaw raman ko kung unsa ilang plataporma aron makapili kinsay angay botaran," hinungdan nga nagkainitay kini nga miresulta sa panagnilayogay sa duha ka mga ginang.

Buskag ang mga buhok sa duha ka mga babaye ug nakaangkon pa og bun-og human sa maong hitabo.


Gipatik sa mantalaang Superbalita Cagayan de Oro Mayo 02, 2016.

Linkback: https://tubagbohol.mikeligalig.com/index.php?topic=82245.0