MikeLigalig.com

SuperBalita Cagayan de Oro
Ni Stephanie Viovicente-Berganio
Monday, July 15, 2013


DEAD on arrival sa balay tambalanan ang usa ka tomboy nga gipusil samtang nagdula og video karera kagahapon mga alas 12:30 sa kaadlawon sa Tangkongan, Pinikitan, Camaman-an, siyudad sa Cagayan de Oro.

Giila ang biktima nga mao si Jenelyn Sacro, 30, dalaga, residente sa susamang dapit.

Sa inisyal nga imbestigasyon sa mirespondeng kapolisan gikan sa Police Station 2 (PS2) sa Cogon, pangulohan ni Police Inspector Dominador Orate, deputy station commander sa PS2, nasuta nga kalit miabot ang duha ka mga lalaki sakay og motorsiklo. Usa ang minaog niini ug deretsong gipusil makalima ka higayon gamit ang kalibre .45 ang biktima.

Gisuwayan pa og dala ang biktima sa Maria Reyna Hospital apan dead on arrival nga gideklarar sa mga doktor.

Dako ang pagtuo sa kapolisan nga adunay kalambigitan sa illegal nga druga ang hinungdan sa kamatayon niini tungod kay gani sa pagdala niini sa balay tambalanan, nakuhaan pa ang bulsa niini og usa ka sachet sa gituohang shabu.

Giangkon usab sa inahan sa biktima nga problemado iyang anak unsay ibayad sa naangkat nga ginadiling druga nga wala niini mabayri nga mobalor og P20 mil. Kanunay na usab kini makadawat og bahad nga patyon.

Ang mga silingan usab sa biktima niingon nga notadong tigpayuhot sa ginadili nga druga ang biktima sa dapit.

Apan taliwala sa negatibo nga mga komento kalabot sa anak, naglaom ang inahan niini nga mahatagan og hustisya ang kamatayon sa anak ug maila ang mga suspetsado.

Ang kapolisan sa PS2 nihimo pa og masusing imbestigasyon kalabot sa kaso.