SuperBalita Cebu
Ni Jonathan F. Tumulak
Wednesday, May 21, 2014
NAILHAN na ang tawo nga napalgang patay nga gisulod og malita ug gilabay sa bukiran nga barangay sa siyudad sa Sugbo.
Ang biktima giila sa iyang pamilya nga mao si Albert Aninipoc, 41,taga sityo Upper Panabang, Barangay Apas, kinsa wa na mauli sa ilang balay kapin na sa usa ka buwan ug gibiyaan ang iyang duha ka mga anak.
Ang niila sa biktima mao ang iyang mga ginikanan nga sila si Rogelio ug Macaria Aninipoc.
Matod ni PO3 Leroy Baguio sa Homicide Section sa Cebu City Police Office nga nakadungog og balita ang mga ginikanan nga adunay tawo nga gipatay nga gisulod og malita.
Ang paghulagway sa gipatay nasusama og pamay-ong sa ilang anak hinungdan nga ilang gi-adto ang Sure Life Funeral Homes ug didto positibo nila kini nga giila.
ANG mga ginikanan ug ang mga pulis nagkaabot sa maong punerarya.
Sigun sa aligasyon sa mga ginikanan nga ang biktima tiggamitan og ilegal nga drugas tungod sa iyang bisyo ug gibiyaan ang iyang pamilya.
Way kalibutan ang mga ginikanan kon si kinsay mga higala o kontra sa ilang anak.
Niadtong Lunes sa hapon, si Aninipoc nakit-an ni Fedilina Reyes, 74, samtang na-ngumpay og ug sagbot sa sityo Mawmawan, Barangay Babag nga gisulod sa malita.
Ang biktima giputos og habol, gisulod sa sako samtang ang sako gipotos og itom nga plastic garbage bag, gibaatan og mga tape, una pa gisulod sa daku nga traveling bag ug gilabay daplin sa dalan dapit sa kasagbutan.
Matod ni Baguio nga daku ang posibilidad nga gipatay ang biktima sa laing lugar ug giputos na lang ug gilabay sa dapit.
Sigun sa autopsy, ang biktima adunay duha ka mga samad sa iyang lusong-lusong ug adunay laing samad dinunggaban sa kilid.
Linkback:
https://tubagbohol.mikeligalig.com/index.php?topic=78364.0
